DILI, STLTIMORLESTE.com – Prezidente Republika (PR), Jose Ramos Horta hatoo kondolensia ba Indonezia ba falesimentu eis Vise Prezidente Try Sutrisno.
Prezidente no Laureadu Nobel ba Pas, Jose Ramos Horta hatoo sentidu kondolensia sinseru ba falesimentu husi Sua Exelensia Jeneral (Rtd.) H. Try Sutrisno, eis Vise Prezidente Republika Indonezia, neebe hakotu iis iha Jakarta, iha loron 2 fulan Marsu tinan 2026, ho idade tinan 90.
Iha karta ofisial kondolensia nian neebe dirije ba Prezidente Republika Indonezia, Jeneral TNI (Hor) (Ret.) Prabowo Subianto Djojohadikusumo, iha loron kinta 5 fulan Marsu tinan 2026, Prezidente Ramos Horta hatoo sentidu kondolensia husi povu Timor Leste ba família enlutada, Governu no povu Indonezia.
Prezidente Ramos Horta rekonese Jeneral Sutrisno nia servisu iha tempu neebe naruk ba nia nasaun, hodi nota ninia kareira militar neebe distintu no ninia mandatu nuudar Vise Prezidente Indonezia husi tinan 1993 too 1998, neebe koloka nia nuudar figura sentral iha istoria resente Indonezia nian. Reflete kona-ba relasaun bilateral, Prezidente rekonhese kompleksidade husi Jeneral Sutrisno nia papel durante momentu signifikativu sira iha istoria komun entre nasaun rua nian.
“Jeneral Try Sutrisno marka prezensa durante momentu sira neebe signifikativu no kompleksu iha istoria relasaun sira entre Timor Leste ho Indonezia. Maski nia papel iha pasadu hanoin hetan ho konsiensia tomak kona-ba dezafiu sira ne’ebé hasoru, ita mós rekonhese katak, iha faze ikus husi nia moris hafoin nia reforma, nia kontribui ba aprosimasaun no kooperasaun entre ita nia nasaun rua,” dehan PR Horta husi Karta neebe STL asesu Sesta nee (06/03/2026).
Prezidente destaka eis Vise Prezidente nia vizita mai Timor Leste iha tinan 2011 nuudar testamentu ida ba ninia kompromisu pesoal atu promove estabilidade no amizade bilateral iha ninia tinan sira hafoin reforma.
Prezidente Ramos Horta konklui ninia mensajen hodi reitera respeitu povu Timoroan nian ba Jeneral Sutrisno nia legadu servisu publiku no dedikasaun ba Indonezia, oferese onfortu ba ninia família sira no nasaun Indonezia tomak iha tempu lutu ida nee.
(eme)
