DILI, STLTIMORLESTE.com – Prezidente Republika (PR), José Ramos Horta hatoo sentidu kondolensia ba povu husi nasaun Tailandia no Mianmar, balun lakon vida no balun kanek grave tanba akontese rai nakdoko.
“Ho laran triste tebes mak hau dirije kona-ba rai-nakdoko devastador neebe ataka Sudeste Aziayiku iha loron 28 Marsu 2025, hodi hamosu lakon vida barak, kanek barak no destruisaun boot iha Tailandia no Mianmar. Hodi Republika Demokratika Timor Leste no ninia povu, hau hatoo ami nia sentidu kondolensia profunda ba vítima sira, sira nia família, no ema hotu neebe afetadu husi katastrofe ida nee. Rai nakdoko ho magnitude 7.7 nee hamosu dezafiu boot tebes ba rejiaun, no ami hamriik ho solidariedade tomak ho ami nia vizinhu sira iha Sudeste Aziátiku durante tempu difísil ida nee,” dehan PR Horta husi Mensajen, Domingu (30/03/2025).
Timor Leste reafirma ninia apoiu moral ba nasaun sira neebe afetadu no rekonhese dezafiu boot neebe sira hasoru iha resposta emerjensia no esforsu rekonstrusaun. TL fo apoiu tomak ba apelu husi Nasoens Unidas no organizasaun umanitaria sira seluk ba mobilizasaun rekursu sira no asistensia urjente ba komunidade sira neebe afetadu.
“Ami elojia reziliensia povu Tailandes nian iha Sua Majestade nia lideransa no forsa povu Mianmar nian. Ami fiar katak ho solidariedade no apoiu internasional, komunidade sira neebe afetadu sei ultrapasa momentu adversidade boot ida nee,” katak PR Horta.
Xefe Estadu hatete, iha tempu krize ida nee, Timor Leste prontu atu fo asistensia saida deit mak bele no hamutuk ho komunidade global hodi estende nia liman iha amizade no solidariedade. Hein katak korajen no esperansa sei orienta durante tempu difísil sira iha oin. Ho konsiderasaun aas liu no solidariedade klean liu.
(eme)
