DILI, STLTIMORLESTE.com – Prezidente Republika (PR), Jose Ramos Horta hatoo parabens ba Governu liu husi Visi Primeiru Ministru, Kalbuady Lay neebe realiza loron Nasional Timor Leste nian iha Expo 2025 Osaka, Kansai, lao ho susesu.
Xefe Estadu hatoo kestaun nee ba jornalista sira, bainhira remata vizita Estadu ba Japaun fila hikas mai Timor -Leste, iha Aeroportu Internasional Nicolau Lobato, Komoro, Sesta (29/08/2025).
“Iha 28 partisipa loron Timor Leste, Timor Leste Day iha Expo 2025 Osaka neebe hau fo parabens ba Visi Primeiru Ministru, Francisco Kalbuady Lay ho nia ekipa sira halo aprezentasaun ida exposizaun ita nia diak tebes, ho kreatividade reflete kultura editidade Timor Leste nia ema lubuk ida vizita familia emperial mos bai ha neeba loron ida anterior familia emperial vizita oras ida. Hau partisipa klaru depois loron Timor nian halo intervensaun diskursu ida Ministru ida neebe responsavel ba Ministru Japones responsavel ba expo marka prezensa,” Harete PR, Horta.
Iha eventu nee marka prezensa iha Expo husi Visi Primeiru Ministru, Kalbuady lay, Visi Prezidente Parlamentar, Xefe Bankada partidu hotu marka prezensa.
“Grupu kultural Timor Leste diak tebes iha aprezentasaun, programa nee diak, organizado diak tuir orariu lafalha depois hau ba vizita favilaun 7 kedas premeiru japaun, ASEAN, Arabi saudita, Emirates Australia, Xina, Portugal, nee diak tebes, no ohin dader tama aviaun fila,” katak PR Horta.
Iha Osaka Prezidente Republika, prezide serimonia ofisial sira ba loron nasional Timor Leste nian iha Expo 2025 Osaka, Kansai.
Serimonia nee halibur liu husi 200 konvidadu iha National Day Hall “Ray Garden,” inklui reprezenta diplomatiku sira, autoridade Japoneza no parseiru internasional sira. Iha intervensaun, Xefe Estadu subliña kompromisu Timor-Leste ho kooperasaun internasional, no mos trajetoria nasaun nian hanesan demokrasia joven, vibrante no totalmente kompromete ba dialogu global.
Eventu nee, neebe mos transmitidu globalmente husi NHK no iha forma virtual, hatudu nasaun nia kultura riku no futuru promissor ba audiensia internasional neebe luan. Programa loron nee nuudar evidensia forte ba Timor Leste nia identidade uniku, ho aprezentasaun kultural sira neebe furak no diskursu ofisial sira neebe lori espíritu nasaun ida neebe ansiozu atu involve ho mundu.
Transmitidu husi NHK no iha formatu virtual, ezibisaun nee hatudu ba mundu diversidade kultural Timor nian no projeta vizaun ba futuru promisor. Programa nee inklui apresentasaun artístika, demostrasaun kultural no diskursu ofisial sira, neebe reflete identidade unika povu timor nian no ninia determinasaun atu hadia liutan ligasaun amizade no kooperasaun.
Paralelamente, iha Pavillaun Timor-Leste (Commons-B), vizitante sira bele hetan esperiensia kona-ba tradisaun nasional, koko gastronomia lokal no aprecia artesanatu timor nian, iha tempu hanesan deskobre oportunidade sira neebe nasaun oferese hanesan destinasaun emerjente. Partisipasaun ida-nee mos hatudu potensial Timor Leste hanesan fatin atrativu ba investimentu no hanesan polu ba troka-kultura iha rejiaun Azia-Pasífiku.
Prezidente Republika, Ramos Horta ninia prezensa iha Expo Osaka 2025 haforsa relevansia ezibisaun ida-nee hanesan plataforma dialogu no projesaun internasional. Loron Nasional Timor Leste nian laos deit konsolida amizade ho Japão no komunidade internasional, maibe reafirma mos kompromisu firme husi nasaun ida nee ba konstrusaun futuru sustentavel, inkluzivu no konektadu globalmente.
Jornalista: Emerenciana Pinto
Editora:Carme Ximenes
