DILI, STLTIMORLESTE.com – Prezidente Republika (PR), Jose Ramos Horta hatoo votus kmanek ba povu Musulmanu iha mundu no Timor Leste, neebe ohin selebra fulan Santa Ramadan bia rohan.
“Hodi povu Timor Leste nia naran, hau hatoo hau nia votus kmanek ba imi hotu iha okaziaun ksolok Eid Al-Fitr nian, neebe marka fulan Santa Ramadan nia rohan. Eid Al-Fitr nuudar tempu ida ho signifikadu espiritual neebe klean—selebrasaun ida ba devosaun, perseveransa, no triunfu hafoin fulan ida jejun, orasaun no refleksaun. Ida nee fo hanoin ba ita kona-ba valor sira neebe hametin ita nuudar Timoroan kompaixaun, solidariedade, no respeitu ba ita idak-idak nia fiar no tradisaun,” katak PR, Horta liu husi nia mensajen iha Palasiu Prezidensial, Segunda (31/03/2025).
PR Horta dehan, nasaun hetan kbiit husi nia diversidade. Harmonia entre komunidade Musulmanu no sidadaun sira ho fiar seluk hatudu espíritu inkluzivu neebe orienta Timor Leste dezde independensia.
“Ho espíritu ida nee, hau bolu ba Timoroan hotu, la haree ba orijen relijiaun nian atu hamutuk hodi selebra esensia Eid Al-Fitr nian—perdaun, rekonsiliasaun no hafoun lasu amizade no família nian. Mai ita kontinua harii Timor Leste ida neebe sidadaun idak-idak bele pratika sira nia fiar ho liberdade, enkuantu kontribui ba ita nia progresu nasional,” katak PR.
Xefe Estadu hatete, bainhira marka okaziaun bensaun ida nee ho orasaun espesial, halibur malu no selebrasaun sira, hein katak ida nee lori ksolok, pas no bensaun ba imi no imi nia família sira.
“Ita nia nasaun nia forsa mak selebra hamutuk ita nia diferensa sira. Hein katak espíritu Eid Al-Fitr inspira ita atu harii Timor Leste ida neebe inkluzivu no armoniozu liu. Dezeju pas, prosperidade no harmonia kontinua moris iha ita nia nasaun doben Minal Aidzin wal Faidzin, Eid Mubarak Sinseru,” dehan Xefe Estadu.
(eme)
