DILI, STLTIMORLESTE.com – Prezidente Republika (PR), Jose Ramos Horta hatoo ninia orasaun no votus kmanek ba Sua Santidade Papa Francisco nia aniversariu pontifikadu ba dala 12.
Iha loron Kinta kalan (13/03/2025) Prezidente Republika Jose Ramos Horta hatoo ninia orasaun ho laran tomak no votus kmanek ba Sua Santidade Papa Francisco iha nia aniversariu pontifikadu ba dala 12.
Iha mensajen ba Santu Padre iha loron 13 fulan Marsu tinan 2025, Prezidente Ramos Horta hatoo solidariedade espiritual povu Timor nian durante okaziaun signifikativu ida nee.
“Iha loron espesial nee, neebe marka ninia pontifikadu aniversariu ba dala 12, ami akompanha ho esperansa no orasaun evolusaun Santu Padre nia saude, hametin fila-fali ami nia dezeju ba ninia rekuperasaun lalais,” dehan PR, Ramos Horta.
PR hatutan, hein katak Maromak haforsa nia no haraik rekuperasaun tomak ba nia, atu nunee nia bele kontinua fo naroman ho nia matenek no laran sadia ba nia ema.
Prezidente reflete kona-ba impaktu klean husi Papa Francisco nia vizita apostolika istoriku mai Timor Leste husi loron 9-11 fulan Setembru tinan 2024, neebe haforsa relasaun profundu entre Timor Leste no Santa Se, husik hela impaktu sosial, relijiozu no espiritual neebe sei dura ba jerasaun hotu-hotu.
“Prezensa Santu Padre iha ita nia nasaun halo foun ita nia kompromisu, katak ita nia fe kontinua sai ita nia kultura, hodi hametin liu tan valor sira dame nian, fraternidade no dignidade umana,” PR deklara.
Mensajen esperansa no solidariedade neebe transmitidu durante ninia vizita kontinua fo inspirasaun ba povu Timor Leste iha konstrusaun sosiedade ida neebe justu no armonia liu.
Prezidente hatoo agradesimentu ba lideransa Santu Padre nian, hodi nota oinsa ninia pontifikadu sai nuudar fonte orientasaun espiritual no inspirasaun ba sarani milhaun resin iha mundu tomak, inklui povu Timor Leste neebe hetan forsa iha ninia mensajen sira kona-ba fe, domin, justisa, pas no solidariedade.
Prezidente louva Santu Padre ninia ezemplu haraik aan no servisu neebe kontinua sai matadalan mai sarani.
“Liu-liu bainhira hasoru dezafiu global sira neebe ita hasoru. Ninia lian profetiku iha defeza ba sira neebe vulneravel liu no kuidadu ba ita nia uma komun sai nafatin hanesan naroman ba umanidade,” dehan nia.
Prezidente Ramos Horta hatoo ninia agradesimentu profundu ba Santu Padre ninia servisu neebe la hatene kolen ba igreja no mundu, no kontinua halo orasaun ba ninia saude, forsa no matenek iha ninia misaun ba domin no pas.
(eme)
