DILI, STLTIMORLESTE.com – Prezidente Republika (PR), José Ramos Horta hatoo votus Paskua ba sarani Katolika iha Timor Leste (TL) no mundu.
“Ho espíritu ksolok Paskua nian, hau hatoo hau nia ksolok kmanek ba Timoroan hotu, tantu iha rai laran no rai liur. Ita nia nasaun hamriik ho orgulhu nuudar nasaun segundu ho persentajen Katoliku boot liu iha mundu, hafoin Sidade Vatikanu. Iha ita nia momentu nakukun liu, fiar mak sai ita nia naroman, ita nia esperansa no ita nia forsa, nuudar testemunha katak ita nia fiar laos deit relijiaun ida, maibe esensial ba ita nia kultura,” dehan PR Horta liu husi mensajen Paskua iha Palasiu Prezidensial Sabadu 19/04/2025.
Prezidente dehan, paskua nuudar momentu ida ho signifikadu espiritual klean, neebe refleta moris hias esperansa nian hafoin tempu nakukun sira viajen ida neebe reflete esperiensia nasional rasik. Hanesan Kristu moris hias husi mate, povu mos liu husi luta durante dekada ho fiar metin no determinasaun.
“Ita nia identidade Katolika laos deit estatístika ida maibe da nee mak ita nia espíritu nasional nia batimentu. Fiar ida nee fo forsa durante ita nia luta ba independensia, no kontinua hametin ita hamutuk bainhira ita harii ita nia nasaun joven ida nee. Ho naroman husi Kristu nia moris-hias, fo hanoin mai ita atu refleta kona-ba valores neebe kesi ita hamutuk kompaixaun, perdaun no unidade. Hirak nee laos deit prinsípiu relijiozu, maibe nuudar baze fundamental iha prosesu ita harii ita-nia demokrasia,” katak PR Horta.
Xefe Estadu dehan , komunidade Kristaun no ba Timoroan hotu neebe hetan sentidu iha epoka santa ida nee, “hau husu ba imi atu simu espíritu esperansa no renovasaun. Mai ita hanoin-hikas ita nia umanidade hamutuk, ita nia kompromisu ba pas, no ita nia mehi koletiva kona-ba Timor Leste ida neebe prosperu. Hein katak Paskua ida nee lori pas, ksolok, no kontinuidade bensaun esperansa nian ba ita no ita nia família hotu,” hakotu.
(eme)
