DILI, STLTIMORLESTE.com – Prezidensia Republika (PR) hahu halo reuniaun ho grupu kategoria juventude no labarik sira ba konkursu prezepiu natal 2025 nian.
Iha loron Sabadu (15/11/2025) Prezidensia Republika liu husi Unidade Serbisu Apoiu Sosial Prezidensia Republika, hahu ona reuniaun preparativa ho konkorete sira husi grupu kategoria juventude no labarik kreativu sira, neebe mai husi bairu, aldeia, suku no postu sira iha Munisipiu Dili.
Reuniaun nee parte husi preparasaun ba konkursu prezepiu natal 2025, neebe sei halao konstrusaun nee iha areadores Palasiu Prezidensial nian. Konstrusaun nee hahu durante loron 15 – 27 Novembru 2025.
Total grupu kategoria sira neebe rejistradu antes hamutuk 82, ba ema boot (adulto) hamutuk 64 no ba grupu husi kategoria labarik total 19.
Inisiativa anual ida nee hetan promove direta husi Prezidente Republika Jose Ramos-Horta no hetan apoiu total husi IX Governu Konstitusional.
Objetivu prinsipal konkursu nee mak hasae konsiensia komunidade kona-ba sustentabilidade ambiental. Enkoraja estudante, asosiasaun no organizasaun sivíl ho inisiativa ida atu hamenus no uza fila fali lixu sira, motiva komunidade atu uza material reutilizavel husi produtu loroloron, hodi hamenus volume lixu iha ambiente. Selebra tempu festival Natal ho valorizasaun elementu simboliku tradisional, enkoraja kriatividade no orijinalidade. Dekora Palasiu Prezidensial ho prezepiu kompetisaun sira, neebe sei ekspozisaun iha area Ai-tarak Laran durante festa natal.
Konkursu prezepiu natal 2025 sei kontínua sai plataforma ida atu hatudu kreatividade povu Timor-Leste nian, aliende nee fo mos kontribuisaun ba preservasaun ambiente no promosaun kultura.
Jornalista: Emerenciana Pinto
Editora: Domingas Gomes
