DILI, STLTIMORLESTE.com – Prezidente Republika (PR), Jose Ramos Horta lori povu Timor Leste (TL) nia naran hatoo sentidu kondolensia ba Governu no povu Australia neebe hetan trafiku.
Prezidente Republika dehan ho hakfodak no triste neebe klean wainhira simu notísia kona-ba atake trajiku neebe akontese iha Praia Bondi iha Sydney, neebe hamate ema inosente sira no halo ema barak hetan kanek, iha hahalok violensia neebe laiha sentidu neebe halo sosiedade Australiana no ema hotu hakfodak tebes.
“Hodi povu Timor Leste nia naran, hau hatoo ba Sua Exelensia Governadora Jeral Honoravel Sra. Sam Mostyn AC, Governu no Povu Austrlia, ami nia sentimentu kondolensia profunda ba vida sira neebe lakon no solidariedade ho família enlutada sira no ho sira hotu neebe afetadu husi hahalok aat ida nee,” dehan PR Horta liu husi komunikadu neebe STL asesu, Segunda kalan (15/12/2025).
Xefe Estadu dehan, Timor Leste kondena makaas forma terorizmu, estremizmu no odiu hotu-hotu, inklui antisemitizmu, no reafirma kompromisu metin ba pas, toleransia no respeitu ba malu entre povu sira.
“Ami sente triste tebes no hakarak espresa katak Australia maka sosiedade ida neebe tolerante liu, diversu no multikultural, atake ida nee neebe akontese iha momentu observasaun relijioza nian, konstitui ofensa ida ba valor universal sira moris nian, dignidade umana, liberdade adorasaun nian, no ko-ezistensia pasifika entre komunidade sira.” katak nia.
Iha momentu laran-susar no laran-susar ida nee, PR ho povu Timor partilha lutu povu Australianu nian no reitera TL nia konfiansa iha reziliensia husi instituisaun demokratiku sira Australia nian no ba kapasidade povu nian atu mantein unidu hasoru adversidade.
Hein katak memoria vítima sira nian bele hetan onra, no hein katak sira nia família bele hetan kmaan, forsa no solidariedade durante periodu sofrimente profunda ida nee.
Jornalista: Emerenciana Pinto
Editor: Xisto Mendonça
