BAUKAU, STLTIMORLESTE.com – Prezidente Republika (PR), José Ramos Horta abertura feira ba komemorasaun loron fundasaun Baukau neebe selebra ba dala 166, iha Sentru Konvensoens Baukau (CCB) Vila Antiga.
“Hau mai marka prezensa iha festa Munisipiu Baukau ho atividade hahu ohin lubuk ida iha nee, infelizmente hau mai deit depois fila,” hateten PR Horta ba jornalista sira iha salaun Sentru Konvensoens Vila Antiga, Baukau, Kinta (01/05/2025).
Atividade neebe Autoridade Munisipiu Baukau liu husi komisaun organizadora estabelese hodi festeja loron fundasaun Baukau, kompostu atividade hanesan jogu trandisional futu manu, jogu futebol, volibol no seluk tan neebe estabelese objetivu atu anima komunidade sira.
Felizmente Prezidente Republika José Ramos Horta hetan konvite husi Autoridade Munisipiu Baukau, hodi partisipa no halo abertura ba atividade feira neebe durante loron tolu, hahu iha loron 01 fulan Maiu no termina iha loron 03 Maiu nee.
“Atividade feira nee diak tebes-tebes para anima mos vida ekonomika,” PR Horta argumenta.
Tuir Prezidente Republika nee katak, atividade feira importante, tanba bele anima vida ekonomika hanesan fo rendimentu ba Mikro Pekenas Empreza neebe hola parte iha feira hodi hadia rendimentu ekonomia familia.
Horta hateten, durante asumi pasta PR tau Timor Leste nia naran iha Mundu lori vizitante internasional mai Timor Leste, neebe kompostu husi Xefe Estadu, Ministrus, Premiu Nobel inklui personalidade oin-oin husi mundu tomak vizita ona Timor Leste.
Haree ba kondisaun neebe iha, PR sei esforsu lori vizitante internasional ba Munisipiu sira, tanba tinan nee Prezidente Republika sei halo eventu boot, hanesan maratona internasional no festival Atauro hodi anima komunidade Timor Leste.
Entretantu komemorasaun loron fundasaun Baukau ba dala 166 hetan partisipasaun masimu husi entidades sivil no militares inklui estudunte sira.
(tom)
