DILI, STLTIMORLESTE.com – Prezidente Republika (PR), José Ramos Horta abertura Feira Nasional ho tema Hametin Pas no Dezenvolvimentu (“Reforsa Pas no Dezenvolvimentu”) iha Porto Dili.
Liu husi diskursu Prezidente Republika hatoo agradese ba Governu neebe fo konvite ba Xefe Estadu, hodi loke abertura ba feira Nasional nee.
“Obrigadu ba imi nia konvite ba hau mai iha nee, klaru tinan sira nee nia laran uluk eis Prezidente agora Prezidente partisipa barak munisipiu, postu no aldeia, ita haree duni no sente duni iha nesesidade ba desentralizasaun, maibe neineik neineik ho prudensia, fo autoridade finanseira ba munisipiu sira, buat neebe Governu nia,” katak PR Horta.
Prezidente dehan, buat neebe iha defende ba kualidade dedikasaun husi Autoridade Munisipiu.
“Loron ida nee loron neebe selebra 20 Maiu, hau agradese ba Governu ba Ministeriu Estatal neebe halo inisiativa ida nee, ohin iha nee hatudu ba ita para haree progresu saida, rekomendasaun saida bele hadia liu tan poder lokal iha dezenvolvimentu lokal,” katak PR Horta.
Prezidente Republika hatete, tema komemorasaun Aniversariu Restaurasaun Independensia Republika Demokratika Timor Leste ba dala 23 “Hametin Pas no Dezenvolvimentu (“Reforsa Pas no Dezenvolvimentu”) 20 Maiu 2002.
“Nee los duni ho dame neebe Timor Leste hetan tinan sira nee laran ona ita haree dezenvolvimentu mos lao, estranjeiru sira neebe uluk iha nee 20 anos liu ba 10 anos liu ba sira servisu oin-oin mezmu jornalista sira uluk fila mai koalia ho hau, sira hotu-hotu hatete sira admira progresu boot iha Timor Leste,” katak Horta.
Komemorasaun Aniversariu Restaurasaun Independénsia Republika Demokratika Timor Leste ba dala 23, Hametin Pas no Dezenvolvimentu Reforsa Pas no Dezenvolvimentu 20 Maiu 2002 – 20 Maiu 2025.
Haktuir despacho husi Sua Primeiru Ministru (No. 005/GPM/II/2025) konaba kria komisaun organizadora ba serimonia ofisial Komemorasaun Aniversariu Restaurasaun Independensia no Proklamasaun Independensia Republika Demokratika Timor Leste nian, iha numeru 3 husi despacho nee mensiona kompozisaun ba estrutura husi komisaun no Ministru Administrasaun Estatal, ezerse funsaun nuudar Prezidente Komisaun hodi lidera ekipa hamutuk ho Membru Governu sira seluk neebe mensiona mos iha despacho refere.
Nunee mos iha Despacho (Ν.07/Μ-ΜΑΕ/II/2025) Estabelese Komisaun Organizadora Tekniku no Seksaun Espesializada sira neebe funsiona hamutuk ho Komisaun Organizadora ba Serimonia Ofisial sira ba Komemorasaun dala 23.
(eme)
