DILI, STLTIMORLESTE.com – Prezidente Republika (PR), Jose Ramos Horta akompanha husi Ministra Edukasaun (ME), Dulce de Jesus Soares, Sekretariu Estadu Ensinu Sekundariu Jeral no Ensinu Tekniku Vokasional, Domingos Lopes Lemos halao abertura ba teste eletroniku ba aplikantes bolsa kandidatu profesores.
Teste eletroniku ba aplikantes bolsa kandidatu profesores nibel ensinu sekundariu no tekniku vokasional nee halao iha Komisaun Funsaun Publika (KFP).
Iha abertura, Prezidente Republika (PR), Jose Ramos Horta dehan, lisensiatura nee kualidade saida ou lisensiatura nee vale saida, diploma neebe mak simu nee vale deit konforme buat neebe iha kakutak, katak aprende duni, tinan balun liu ba rona, nee kleur ona iha Ministeriu Finansas, sira halo teste ida iha nee ba, 7% deit mak hatene nibel matematika, iha Ministeriu Negosiu Estranjeiru no Kooperasaun (MNEK) neebe lingua prinsipal lo-loos lian inglês, purtantu Ministra halo ida nee ho korajen no forsa, lalika tauk, foin daudaun iha relatoriu ida, sira neebe protesta nee sira prontu atu tuir teste, maibe tenke sira hotu-hotu liu, nee sira nian deklarasaun rasik iha relatoriu nee.
“Setor edukasaun tinan lubuk ida nia laran nee laiha governu ida mak konsege halo kontinuidade halo politika diak, nee halo kontinuidade dezde independensia too agora, tanba ita nian sistema politiku partidariu, tanba ita nian politika Timor nian, tanba ita nian politika demokrasia entre aspak laiha kontinuidade, maske planu estratejiku dezenvolvimentu nasional, maibe laiha estabilidade no kontinuidade intermus de governasaun, ita haree mos dezastre boot. Hau hanoin sira ho diploma iha Timor nee 10% mak karik liu, se ita halo ho rigor konforme deit, standar ASEAN nian, Nasaun Unidas nian, standar internasional nian,” dehan PR Horta ba jornalista sira liu husi diskursu iha edifisiu KFP, Dili Segunda nee (19/05/2025).
Nunee mos Ministra Edukasaun (ME), Dulce de Jesus Soares hatete, nuudar Ministra Edukasaun, hanesan onra no previleiju ida hodi partisipa iha okaziaun signifikante ida nee.
“Ohin, ita halibur hamutuk iha momentu importante tebes ba futuru edukasaun nian iha Timor Leste, serimonia abertura ba teste Bolsa Kandidatu ba futuru profesor sira hodi hanorin iha ita nia eskola sekundária sira. Teste ida nee marka momentu importante iha edukasaun, hodi garante katak sala de aula iha eskola sei lidera husi manorin sira neebe laos deit iha dedikasaun, maibe mos abilidade no konhesimentu nesesariu hodi forma foinsae sira iha Timor Leste nia hanoin,” katak nia.
Dulce dehan, tinan kotuk Ministeriu Edukasaun halo teste bolsa kandidatu faze Primeiru no Segundu ba Edukasaun Pre Eskolar no Ensinu Baziku hodi hatan ba nesesidade kuadru pesoal iha eskola sira. Husi numeru nee, manorin nain 1.819 mak kolokadu ona iha pre-eskola no ensinu báziku sira. Iha kandidatu nain 1.090 neebe sei iha bolsa nee, ka lista espera, neebe sei koloka tan atu hanorin iha eskola Ensinu Baziku sira tuir nesesidade kuadru pesoál. Oras nee ekipa ida la’o daudaun hodi buka professor sira neebe iha moras neebe prevene sira husi hanorin tuir orariu ona, no ajuda sira atu reforma ho dignidade. Ne’e loke dalan ba sira ne’ebé sei iha Bolsa atu koloka mós lalais, no ho ida-ne’e kontinua hasae kualdidade husi eskola sira.
(jac)
