DILI, STLTIMORLESTE.com – Prezidente Republika (PR), Jose Ramos Horta apoiu nesesidade baziku ho osan ba Uma Mahon Sentru Esperansa Ba Feto Salele.
Prezidente Republika, Jose Ramos Horta ho komitiva vizita Uma Mahon Sentru Esperansa ba Feto iha Suku Maudemo, Postu Administrativu Tilomar, Munisípiu Kovalima.
Iha biban nee, Diretora Uma Mahon Sentru Esperansa ba Feto, Madre Santina Imaculada de Oliveira SSpS liu husi nia diskursu iha knaar fatin Salele, Kinta (27/03/2025) hatoo agradese ba Aman Maromak tanba ho Nai nia grasa, domin no tulun mak ohin loron halibur hamutuk iha fatin ida nee.
Aproveita oportunidade ida nee, hanesan responsabilidade masimu iha Sentru Esperansa ba Feto/Uma Mahon hamutuk ho madres, funsionaria no alin vitima sira hakarak hatoo benvindu no agradese wain ba aman doben Prezidente Republika neebe ho domin no laran luak hakat ona mai fatin ida nee hodi haree no sente direita nia oan sira nia situasaun no kondisaun moris real iha Sentru Esperansa ba Feto/Uma Mahon Salele.
“Ami hotu agradese, tanba ami nafatin hetan apoiu no suporta. Ami agradese tebes, tanba liu-liu ba oan sira neebe hela iha fatin ida nee, durante nee ami haree deit liu husi televizaun, dala barak labarik sira dehan bainhira mak ita bele hasoru Prezidente Republika direita, entaun ami labele realiza sira nia mehi, tanba sira barak mak mai husi munisípiu, area rural neebe labele asesu televizaun. Entaun ohin loron sira bele haree no hasoru direita Prezidente Republika ho ekipa iha fatin ida nee,” haktuir nia.
Nunee, agradese ba Governu Timor Leste neebe apoiu no suporta kongregasaun SSpS, liu husi Fundadaun Sentru Esperansa Feto, durante tinan rihun rua neen too mai momentu ida nee.
Nia hatutan, kongregasaun harii organizasaun tinan rihun rua neen, too mai momentu ida nee, lao mesak, la servisu mesak, la sente mesak, tanba Governu Timor Leste nia apoiu neebe masimu tebes ba Uma Mahon ida nee.
Iha biban nee, Prezidente Republika, Jose Ramos Horta hatoo agradese ba madre sira husi kongregasaun husi SSps neebe simu Prezidente ho komitiva diak tebes.
“Obrigadu simu ami iha nee, ohin dader ba fatin barak, lori tulun baziku oituan, defisiensia sira, membru vulneravel fo tulun oituan.
“Tulun neebe mai husi Prezidensia Republika, tulun nee mak husi estadu, hau halo deit hau nia obrigasaun, halo deit hau nia konsiensia, ita buka ajuda ba labarik sira neebe hetan violensia, ka labarik sira neebe moris iha difikuldade susar tebes-tebes iha Timor Leste laran,” dehan PR.
Prezidente Republika hatutan, apoiu neebe entrega mai husi estadu, governu, parlamentu. Governu maun Xanana nia apoiu 100% atividade neebe Prezidente Republika hamutuk buka hamenus tiha inan aman, avo sira nia susar.
“Maibe komunidade balu internasional hanesan Japaun, Korea du Sul, iha mos ema barak iha Australia konhese hau husu ba sira, sira sei kontinua nafatin apoiu programa sira,” hatete nia.
Nesesidade baziku neebe mak apoiu husi Prezidente Republika mak hanesan foos, mina, manu tolu, mesin suku roupa, mikser halo dosi nian, sasan eskola, atributu hariis, roupa, sapatu ba labarik no hetan apoiu husi Nippon Foundation husi nasaun Jepan. Aleinde nee uma Mahon Sentru Esperansa ba Feto iha Salele hetan mos apoiu orsamentu husi Prezidensia Republika ho total US$ 1000.
(eme)
