DILI, STLTIMORLESTE.com – Prezidente Republika (PR), Jose Ramos Horta atribui medalha Ordem Timor Leste (TL) ba Ikhfan Haris, hodi hametin relasaun bilateral.
Iha loron Kinta nee (24/07/2025) Prezidente Republika Jose Ramos Horta kondekora Medalha Orden Timor Leste no Sertifikadu Rekonhesimentu ba Prof. Dr. Ikhfan Haris, Diretor Sentru Kultural Indonezia (Pusat Budaya Indonesia) iha Dili, iha serimonia neebe halao iha Palasiu Prezidensial Nicolau Lobato.
Premiu prestijozu nee fo onra ba Prof. Haris nia kontribuisaun esepsional sira hodi promove amizade, interkambiu kultural, no kooperasaun edukasional entre Timor Leste no Indonezia.
Matenek nain, edukador no diplomata distintu ida, Prof. Dr. Ikhfan Haris dedika aan ona liu dekada rua hodi avansa kolaborasaun trans-fronteira iha ensinu superior, peskiza, no diplomasia kultural. Nuudar Adidu Edukasaun no Kultura Indonezia nian iha Dili, nia lidera ona inisiativa sira neebe hametin ligasaun povu-ba-povu, inklui interkambiu akademiku, programa ba língua, no projetu peskiza konjuntu neebe fo benefísiu ba instituisaun timoroan sira.
Prezidente Ramos-Horta sublina Prof Haris nia impaktu transformativu hateten “Prof. Dr. Ikhfan Haris dedika ona tinan barak ba servisu hodi hametin lasu entre ita-nia nasaun liuhusi interkambiu kultural no edukasional. Ninia esforsu fo benefísiu ba ema Timoroan barak iha tinan hirak nia laran no merese hetan rekonesimentu no valorizasaun hosi Estadu.”
Orden Timor Leste nian mak nasaun nia onra aas liu neebe konfere ba indivíduu sira neebe nia kontribuisaun signifikativamente avansa Timor Leste nia dezenvolvimentu no relasaun internasional sira. Timor Leste rekonhese katak haburas amizade no kooperasaun entre povu Timor-Leste no Indonezia importante tebes ba pas, estabilidade nasional, no dezenvolvimentu nasaun nian.
(eme)
