DILI, STLTIMORLESTE.com – Iha fulan Novembru tinan nee, Prezidente Republika sei viajen ba Roma, hodi konvida sua santidade Papa Leao XIV mai vizita sarani no povu Timor Leste.
Prezidente Republika, Jose Ramos Horta hatoo kestaun nee ba jornalista sira, bainhira remata entrega sertifikadu ba manan nain foti video iha vizita sua santidade Papa Francisco mai Timor Leste, iha palasiu Prezidensial, Nicolau Lobato, Bairru Pite, Dili, Tersa (16/09/2025).
Prezidente Republika hatete, tempu badak sei viajen ba Roma hodi halo enkontru ofisial ho sua santidade Papa Leao, iha hasoru malu nee Prezidente Republika sei konvida Papa vizita Timor Leste.
“Tempu badak hau sei ba Roma, komfirma tiha ona ho sua santidade papa leao atu enkontru ofisial ho Papa, depois mak ita haree tok bainhira Amo Papa Foun bele vizita ita, hau sei halo apelu ba amo Papa favor mai vizita ami, labele kleur,” dehan PR, Horta.
Prezidente Republika hatutan, Sua santidade Papa Francisco nia programa prioridade Prezidente lahatene, maibe serteza mak Papa hakarak ba fatin sira neebe konflitu boot hanesan Ukrania Rusia Gaza no fatin neebe iha funu situasaun aat nee. Baibain nee Papa sira ba uluk rai sira neebe situasaun difisil nee.
Bainhira mak Prezidente hasoru malu ho sua santidade Papa Leao 14, hatan ba kestaun nee Prezidente Republika hatete, sei hasoru Papa iha fulan novembru tinan nee.
“Iha fulan Novembru iha ona data maibe hau labele hatete, imformasaun sei mai husi nunsiatura, iha fulan Novembru,” Katak Horta.
Xefe Estadu afirma, viajen ba Roma iha fulan Novembru nia laran, maibe data fiksu lolos mak sei klaru tanba sei hein imformasaun mai husi Nunsiatura.
Jornalista: Emerenciana Pinto
Editora: Carme Ximenes
