DILI, STLTIMORLESTE.com – Prezidente Republika (PR) Jose Ramos Horta hamutuk ho Deputada Republika Indonezia, Julie Laiskodak, vizita konventu madre Alma hodi haree direita kondisaun labarik sira nia.
Iha biban nee, Prezidente Republika Jose Ramos Horta ba jornalista iha salaun Madre Alma segunda (25/11/2025) hatete, ohin mai vizita tanba kleur ona la mai, tanba nee mak aproveita mai haree ho Deputada Julie hodi halo kontribuisaun.
“Hau akompanha, tanba primeiru kleur ona hau la mai, hau mos hakarak aproveita mai, ibu Julie halo kontribuisaun oituan. Hau mos haree labarik ida ka rua iha Alma, hau hakarak haree se bele lori ba liur halo operasaun, ida hau koalia tiha ona doutor matan lubuk ida iha Australia, Suisa, Inglatera, haruka tiha ona nia extrin matan ba sira semana hira liu ba doutor matan boot esperiensia mundial iha Inglatera, Suisa sira estuda hela, se bele halo operasaun nia bele haree matan haree oituan ka lae. Ida fali joven feto ida iha nee buat hotu-hotu diak mas problema boot iha nia kotuk, nee mos hau koalia hela ema iha liur atu lori ba,” dehan PR Horta.
Prezidente Republika hatete, nia koalia ona ho mediku balun husi rai liur, karik halo operasaun ba labarik sira neebe mak ho kondisaun defisiensia Prezidente mak sei selu.
“Hau hatete ba sira se imi bele opera hau rasik selu nia operasaun, tanba se lae demora liu husi governu, liu husi neebe-neebe buka osan iha nee, Australia, Inglatera, entaun hau hatete deit se sentista sira hatete bele iha posibilidade nia rekupera matan la’ós 100%, mezmu 10% deit hau hatete entaun hau rasik lori nia ba sira opera. Loron ida amu Papa mai nee mak ami lori nia ba missa iha Tasi Tolu, tanba nia haree nia lalatak entaun signifika bele karik doutor sira estuda hela, sira laos optimista, tanba nee mak hau hakarak mai haree, relasaun diak loos ho ema balun osan boot iha Indonezia iha neebe-neebe,” katak PR Horta.
Iha biban nee, Deputada Republika Indonezia, Julie Laiskodak hatete, ohin hamutuk ho Prezidente Republika Jose Ramos Horta mai haree direita labarik sira nia kondisaun.
“Hau mai Timor Leste tanba ita iha relasaun familia, husi ohin too aban hau sei iha Timor Leste liu-liu iha Dili, no hau mai tanba hetan konvite husi Prezidente Republika, tanba antes nee Prezidente mak ba vizita ami no too iha ami nia uma, hanesan iha NTT bainhira ema ruma ba ona uma hau tenke ba fali ninia uma,” katak nia.
Nia hatutan, vizita ida nee premeira vez nia mai Timor Leste, tuir ajenda neebe prepara ona mak Primeiru mai Vizita konventu madre Alma, no konventu nee halibur labarik ema ho defisiensia ba nia laos buat foun, tanba iha Flores mos iha no iha NTT mos iha, no antes nee nia mos vizita nuudar espoza husi Governador NTT.
Maske Timor Leste agora daudaun Indepedente hamriik mesak ona, maibe ho Indonezia hanesan nasaun vizinhu no belun tanba nee nafatin iha relasaun ba malu.
Nunee mos Irma Marta Do Santo Husi Kongregasaun Alma hatoo agradese ba Maromak tanba ho laran luak no domin ohin bele hetan vizita husi deputada husi indonezia hamutuk ho Prezidente Republika ba vizita direita konventu madre alma hodi haree direita labarik sira nia kondisaun.
“Primeiru agradese ba Maromak ba grasa neebe Nai Maromak fo ami hetan liu-liu vizita husi membru parlamentu husi Indonezia, Kupang nomos Prezidente Republika rasik mai hamutuk ho ami sente kontente no orgulhu tebes ba domin no atensaun neebe hakarak tau matan ba labarik sira neebe ho kondisaun defisiensia ho tipu oin-oin,” katak nia.
Irma hatete, labarik neebe mak ho kondisaun defisiensia hamutuk nain 18 mak hela hamutuk ho labarik sira iha Konventu Alma no labarik sira neebe mak mai terapi hamutuk 45.
Irma hatutan, dezafiu neebe mak sira hasoru mak liga ho aula aprendisajen ba labarik ema ho defisiensia sira, no labele simu labarik sira ho numeru barak tanba fatin mak la sufisiente.
(eme)
