DILI, STLTIMORLESTE.com – Prezidente Republika (PR), Jose Ramos Horta despede ho Embaixador Austria ba Timor Leste, Thomas Loidl, tanba termina ona mandatu.
Prezidente Republika (PR), Jose Ramos Horta simu Embaixador Austria ba Timor Leste, Thomas Loidl ba sorumutu iha Palasiu Prezidensial Nicolau Lobato hanesan despedida ikus nian tanba ninia remata ona nia mandatu tinan haat iha Timor Leste.
Bainhira remata hasoru malu Embaixador Austria ba Timor Leste, Thomas Loidl, ba jornalista iha palasiu Prezidensial Nicolau Lobato, Bairo Pite, Sesta lokraik (30/01/2026) hatete, mai hasoru malu ho Prezidente Republika Jose Ramos Horta hodi komprementa ho desde ho Xefe Estadu tanba mandatu nuudar embaixador Austria Iha TL termina ona.
“Hau nuudar embaixador Austria iha Timor Leste mai hasoru malu ho Prezidente Republika hodi halo despedida ikus tanba hau nia mandatu remata ona,” dehan EmbaixadorThomas.
Durante audiensia parte rua selebra hametin relasaun neebe signifikativu, marka ho abertura Konsuladu Austria nian iha Díli no harii parseria edukasional foun sira. Inisiativa sira-nee konsege integra ona Universidade Nasional Timor Lorosae (UNTL) ba iha kuadru universidade ASEAN nian no fo treinamentu espesializadu ba estudante timoroan sira iha Akademia Diplomatika prestijiadu iha Viena.
Diskusaun nee mos koalia kona-ba progresu estratejiku rejional, inklui Timor-Leste nia susesu adezaun ba ASEAN no ninia prezidensia neebe sei mai iha tinan 2029.
Embaixador Loidl fo parabens ba dezenvolvimentu diplomatiku nasaun nian no fahe ninia avaliasaun pozitivu kona-ba konversa nível altu foin lalais nee entre Prezidente no Primeiru-Ministru Australia. Nia foka liu-liu ba potensial ekonomiku husi kanu (pipeline) Greater Sunrise neebe sei mai iha tasi-ibun Timor-Leste, hodi fo vizaun ba futuru dezenvolvimentu industrial no seguransa enerjetika ba nasaun.
Atu hametin liu tan kooperasaun internasional, Embaixador hatoo konvite formal ba Prezidente Ramos Horta atu tuir konferensia nível altu ministerial kona-ba dialogu inter-relijiozu iha Viena tinan nee.
Iha biban nee Prezidente Republika Jose Ramos Horta hatoo ninia gratidaun klean ba Embaixador nia servisu dedikadu no kontribuisaun signifikativu ba dezenvolvimentu nasaun nian durante tinan haat nia laran.
(eme)
