DILI, STLTIMORLESTE.com – Prezidente Republika (PR), José Ramos Horta simu Embaixador Irlanda hodi halo despedida iha Palasiu Prezidensial.
Iha loron Segunda lokraik (16/06/2025) Prezidente Republika José Ramos Horta simu Embaixador Irlanda ba Timor Leste, Padraig Francis, iha vizita kortezia despedida iha Palasiu Prezidensial Nicolau Lobato.
Enkontru nee marka konkluzaun husi mandatu diplomatiku Embaixador Francis nian iha Timor Leste, neebe nia hatoo apresiasaun ba oportunidade atu servi iha Timor Leste no asiste besik nasaun nia progresu.
Xefe Estadu subliña, relasaun amizade neebe klean no dura entre Timor Leste no Irlanda hodi destaka Irlanda nia apoiu makaas durante Timor Leste nia viajen ba independensia no sira nia kompromisu kontinua ba relasaun bilateral neebe metin.
Ramos Horta agradese mos ba observasaun pozitivu sira husi Embaixador kona-ba dezenvolvimentu nasaun nian, hanesan mos ninia konfiansa ba futuru neebe nabilan ba nasaun. Destaka mos papel konsistente husi Irlanda neebe empenada iha dezenvolvimentu Timor Leste.
Prezidente mos hatoo ninia agradesimentu klean ba Irlanda nia dedikasaun ba pas internasional, direitus umanus no dignidade ba ema hotu.
Ikus liu, Prezidente dezeja susesu ba Embaixador Francis iha ninia knaar foun sira iha futuru no afirma fila fali Timor Leste nia kompromisu atu kontinua kooperasaun neebe dura ho Irlanda.
(eme)
