DILI, STLTIMORLESTE.com – Prezidente Republika (PR), Jose Ramos Horta halo enkontru ho Embaixador Japaun Kimura Tetsuya hodi koalia assuntu bilateral rai rua.
Bainhira remata halo enkontru, Embaixador Japaun Kimura Tetsuya ba jornalista sira iha Palasiu Prezidensial Bairo Pite Kinta (14/11/2024) hatete, hasoru malu koalia assuntu bilateral entre Japaun ho TL.
“Ohin hau mai halo enkontru ho Prezidente Republika José Ramos Horta hodi koalia kona-ba relasaun bilateral entre Japaun no Timor Leste. Iha enkontru nee hau informa ba Prezidente Ramos Horta kona-ba investimentu privadu sira Japaun nian iha Timor Leste. Projetu prinsipal mak projetu konstrusaun roo, preparasaun nee lao hela,” katak Embaixador.
Embaixador hatete, levantamentu remata ona no prosesu ba lisensamentu ambiental lao hela no parte rua hahu ona negosiasaun ho governu, kona-ba detalhu projetu. Ida nee hanesan pasu ida husi dezenvolvimentu pozitivu neebe hahu daudaun.
Nia hatutan, Governu Timor Leste no Japaun iha ona akordu kona-ba nee. Kona-ba enkuadramentu internu tekniku iha Japaun, nunee sei iha formasaun ba trabalhador sira iha Japaun no Governu rua nee konkorda ona kona-ba enkuadramentu nee.
Tamba nee iha futuru hein katak, servisu nain ka formandu sira sei ba Japaun hodi tuir treinamentu no aprende buat ruma atu aumenta sira nia abilidade hodi fila mai servisu ba empreza neebe halo daudaun investimentu iha Timor. Tan nee, ohin mai atualiza ida nee ba Prezidente Republika atu hatene kona-ba progresu no dezenvolvimentu hirak nee.
Tanba nee iha semana tuir mai ka semana oin Xefe Reprezentante Jeneral empreza nian ida sei mai husi Indonezia, tanba kompanhia Japaun barak liu mak interese atu investe, tanba nee mak ajensia Governu Japaun nian neebe mak responsavel ba komersiu no investimentu sei halo vizita mai Timor atu haree besik liu tan saida mak investimentu Japaun nian hahu daudaun iha país nee.
Tamba nee jerente nee sei mai iha Timor Leste, hodi diskuti liu tan kona-ba oinsa mak bele aumenta tan investimentu privadu husi kompanhia Japaun sira, nee mak topiku prinsipl sira iha enkontru ho Prezidente Repúblika ba loron ohin.
Prezidente Repúblika José Ramos Horta hatete, kontente tebes atu rona katak projetu husi kompanhia privadu Japaun nian sira iha Timor Leste kontinua. No hein katak ida nee sei akontese.
Projetu hanesan nee sei fo impaktu pozitivu ba ekonomia Timor Leste nian iha futuru.
(eme)
