DILI, STLTIMORLESTE.com – Prezidente Republika (PR), Jose Ramos Horta halao enkontru ho Embaixador Portugal iha Timor Leste, Duarte Bue Alves, hodi hametin parseria iha area edukasaun.
Bainhira remata halo enkontru, Embaixador Portugal iha Timor Leste, Duarte Bue Alves ba jornalista iha Palasiu Prezidensial Nicolau Lobato, Bairo Pite, Segunda (26/01/2026) hatete, primeiru vez mai hatoo bom ano ba Prezidente Republika Jose Ramos Horta, iha biban nee Embaixador Portugal elojiu ba Timor Leste nia dalan notavel no promete haluan parseria iha edukasaun.
Embaixador hatete, iha enkontru nee Prezidente Republika mos relata nia viajen ba iha Davos Suisa neebe partisipa iha Forum Ekonomiku neebe halao liu ona.
“Klaru iha enkontru koalia kona-ba relasaun bilateral nomos koalia mos kona-ba CPLP, tanba daudaun nee Timor Leste asumi Prezidensial CPLP no reuniaun Xefe Estadu no Xefe Governu neebe halao iha dia 16 dezembru neebe koalia husi Online koalia konaba akontesimentu iha Guine Bissau,” dehan Embaixador.
Durante enkontru, Embaixador hatoo votus tinan foun ba povu timoroan no fo parabens ba Prezidente Ramos-Horta ba ninia servisu diplomatiku foin lalais nee iha Forum Ekonomiku Mundial iha Davos.
Enkontru nee fo sai relasaun espesial no resípruka entre Timor-Leste no Portugal, liuliu kona-ba lideransa Timor-Leste nian foin lalais nee hodi asume Prezidensia CPLP nian hafoin krize polítika iha Guine-Bissau.
Diskusaun nee mos koalia kona-ba valor demokratiku neebe nasaun rua nee fahe ba malu, no Embaixador Alves fo elojiu ba Timor-Leste nia progresu notavel no progresu sira neebe hetan ona desde restaurasaun independensia.
Líder rua nee troka hanoin kona-ba eleisaun prezidensial neebe lao hela iha Portugal no siklu eleitoral sira neebe atu mai iha Timor-Leste, no reafirma sira-nia preokupasaun hamutuk ba repozisaun orden konstitusional no respeitu ba direitus umanus iha Guine-Bissau.
Embaixador hatutan katak sinerjia polítika entre Díli no Lisboa kontinua sai asuntu importante ba sira-nia kooperasaun internasional entre nasaun rua nee.
Topiku boot ida iha enkontru nee mak susesu husi Programa Estratejiku Kooperasaun nian (2024-2028), neebe agora lao hela. Embaixador hateten katak iha tinan 2026, sei iha numeru rekorde ho profesor portuges nain-145 neebe sei hanorin iha eskola CAFE sira iha munisípiu 14 hotu, servisu hamutuk ho edukador timoroan nain 200.
Haree ba oin, Prezidensia Republika no Embaixada Portugal nian afima fila-fali kompromisu atu haluan tan projetu CAFE liuba ninia ambitu agora nian, hodi hametin liutan edukasaun no dezenvolvimentu kapital umanu nuudar pilar vital ba parseria Timor Leste ho Portugal.
(eme)
