DILI, STLTIMORLESTE.com – Prezidente Republika (PR), Jose Ramos Horta halo enkontru ho Embaixador Republika Indonezia (RI) ba ASEAN, M.I Derry Aman hodi deskuti hamutuk atu hametin liu tan relasaun bilateral rai rua.
Bainhira remata hasoru malu, Embaixador Republika Indonezia ba ASEAN M.I, Derry Aman ba jornalista sira iha Metiout Kinta (18/12/2025) hatete, ondra boot mai hasoru malu ho Prezidente Republika Timor Leste hodi fahe esperiensia ba malu oinsa bele hametin relasaun bilateral rai rua liu husi servisu hamutuk, hametin kooperasaun ASEAN.
“Onra no ksolok ida ba hau atu vizita Timor Leste. Ba hau, foin primeira vez enkontru ho Prezidente Ramos Horta. Ami rona ona hanoin no esperiensia oin-oin husi Prezidente Ramos Horta, no konserteza ami bele aprende husi sira no servisu atu hametin relasaun bilateral sira entre Indonezia no Timor Leste,” dehan Embaixador.
Embaixador Indonezia ba ASEAN dehan, iha enkontru nee oinsa hametin lasu amizade no kooperasaun bilateral liu-liu nuudar Reprezentante Permanente Republika Indonezia nian ba ASEAN, aprende lisaun barak durante konversa no diskusaun sira ho Prezidente.
Iha hasoru malu nee Prezidente Ramos Horta nia perspetiva sira kona-ba oinsa Indonezia no Timor Leste bele kontinua servisu hamutuk hodi hametin kooperasaun ASEAN nian, neebe hein katak sei fo benefísiu ba ASEAN, liu-liu ba povu Timor Leste.
“Dala ida tan, durante enkontru neebe relativamente badak, hau aprende buat barak kona-ba hametin kooperasaun bilateral entre Indonezia no Timor Leste. Ami mos aprende oinsa Indonezia no Timor Leste bele fahe sira nia relasaun, partikularmente kooperasaun ASEAN nian, no kooperasaun entre Ministeriu Negosiu Estranjeiru sira iha Indonezia no Timor Leste,” haskotu nia.
Nia hatutan, iha hasoru malu nee Prezidente Republika fahe esperiensia barak ba embaixador no embaixador mos aprende buat barak husi Prezidente Republika Jose Ramos Horta, no ba oin sei hametin lasu amizade entre Timor Leste no Indonezia iha kontekstu oin-oin.
Jornalista: Emerenciana Pinto
Editor: Xisto Mendonça
