DILI, STLTIMORLESTE.com – Prezidente Republika (PR), Jose Ramos Horta halo enkontru bilateral ho Prezidente Senadu Kamboja, hodi koalia oinsa hametin relasaun biletaral.
Iha biban nee Prezidente Senadu Kamboja Hun Sen ba jornalista sira iha Palasiu Prezidensial Nikolao Lobato, Bairo Pite, Kinta (08/05/2025).
Nia hatete, ohin halo enkontru ho Prezidente Republika Timor Leste koalia oinsa hametin relasaun bilateral.
Iha biban nee Prezidente Senadu hatoo agradese no apresiasaun ba Estadu Timor Leste neebe simu nia ho ekipa diak tebes.
“Hatoo apresiasaun ba ita boot sira, tanba simu hau ho ekipa diak tebes, durante hau nia vizita iha Timor Leste,” dehan Prezidente Senadu Kambodia Hun Sen.
Nia hatete, ohin halo enkontru bilateral ho Prezidente Prezidente Timor Leste hodi troka hanoin ba malu, no oinsa bele hametin relasaun bilateral entre Kamboja ho Timor Leste iha futuru metin diak liu tan.
“Ita boot sira hatene katak ami foin iha diskusaun klean ida. Entre hau no Exelensia Prezidente Republika Jose Ramos Horta koalia kona-ba relasaun bilateral sira,” katak nia.
Iha fatin hanesan, Prezidente Republika Jose Ramos Horta sente kontente hasoru malu ho Prezidente Senadu Kamboja hodi koalia oinsa troka hanoin ba malu no hametin kooperasaun relasaun bilateral iha futuru.
Prezidente Republika hatoo benvindu ba Samdech Akka Moha Sena Padei Techo HUN SEN neebe vizita Timor Leste dala rua.
“Ho laran kmanek hau hatoo benvindu ba Samdech Akka Moha Sena Padei Techo HUN SEN, Prezidente Senadu no Eis Primeiru Ministru Reinu Kamboja nian, mai Timor Leste ba vizita istoriku ida-nee,” katak Prezidente Republika Jose Ramos Horta.
Prezidente Republika hatete, Prezensa Samdech Techo HUN SEN iha Timor Leste laos deit simboliza amizade entre nasaun rua maibe mos loke kapítulu foun iha relasaun entre povu-ho-povu.
Prezidente Republika dehan, vizita istoriku ida nee marka etapa signifikativu iha relasaun bilateral entre Timor Leste no Kamboja, hafoin estabelesimentu Embaixada Kamboja nian iha Dili no aprezentasaun kredensial husi Embaixador CHUN Sovannarith iha loron 29 Abril 2025.
(eme)
