DILI, STLTIMORLESTE.com – Prezidente Republika (PR), Jose Ramos Horta halo enkontru bilateral ho Sub-Sekretariu Estadu ba Asuntu Polítiku Estadus Unidus nian iha Kuala Lumpur, hodi hametin parseria rai rua.
Tuir Komunikadu neebe STL asesu husi media PR, Tersa nee (28/10/2025) hatete, Prezidente Republika Jose Ramos Horta halao enkontru bilateral ida neebe produtivu ho Sub-Sekretariu Estadu ba Asuntu Polítiku Estadus Unidus Allison Hooker, enkontru neebe halao iha W Hotel iha Kuala Lumpur, sublina parseria neebe metin no dura entre nasaun rua nee.
Líder sira halo revizaun ba kooperasaun bilateral neebe kleur ona entre Timor Leste no Estadus Unidus, neebe hahu kedas dezde Timor Leste nia independensia iha tinan 2002.
Sub-Sekretariu Hooker hatoo mensajen formal ida husi Sekretariu Estadu Estadus Unidus nian, Marco Rubio, ho laran kmanek hatoo parabens ba Timor Leste nia marku foin lalais nee hodi sai membru tomak ASEAN nian.
Deklarasaun nee rekonhese dedikasaun nasaun nia vizaun ASEAN nian ba pas, estabilidade no prosperidade no reafirma kompromisu Estadus Unidus nian ba sentralidade ASEAN nian.
Prezidente Ramos Horta espresa nia apresiasaun klean ba parseria Estadus Unidus nian neebe lao hela, espesialmente sublina servisu importante iha area seguransa no defeza, kontribuisaun sira husi Peace Corps nian no projetu infraestrutura krítiku sira neebe halao husi U.S. Navy Seabees
“Peace Corps no U.S. Navy Seabees sai ona hanesan parseiru instrumental durante dekada ida liu ba,” dehan Prezidente Ramos Horta.
“Ita nia ezersísiu militar konjunta foin lalais nee hetan susesu, no Seabees fornese formasaun neebe folin-laek ba ami nia forsa defeza enkuantu harii no hadia infraestrutura esensial sira hanesan eskola no klínika sira. Hau husu ba ami nia parseiru sira iha EUA atu kontinua investimentu vital iha programa MCC iha area xave rua jestaun bee no edukasaun ho kualidade aas.” Dehan PR Horta.
Nuudar resposta, Sub-Sekretariu Hooker agradese ba Prezidente tanba fahe esperiensia Timor-Leste nian no garante ba Prezidente katak Estadus Unidus iha kompromisu atu avansa objetivu dezenvolvimentu Timor-Leste nian liuhusi envolvimentu bilateral neebe kontinua.
Nia nota katak programa ajuda sira husi EUA agora daudaun hetan hela revizaun atu hasae sira nia integrasaun no efikasia iha estrutura Departamentu Estadu nian.
Parte rua konkorda atu aprofunda kooperasaun neebe iha ona. Estadus Unidus hatudu interese atu diskute Nota Entendimentu ida hodi aumenta asesu ba Aerodromu Baucau no atu esplora kolaborasaun neebe aumenta iha setor komersiu. Enkontru remata ho kompromisu partilhado hodi fortalese relasaun bilateral no servisu hamutuk besik kona-ba oportunidade sira iha futuru neebe iha interese ba malu.
Jornalista: Emerenciana Pinto
Editor: Xisto Mendonça
