DILI, STLTIMORLESTE.com – Prezidente Repúblika (PR), Jose Ramos Horta halao enkontru ho Enkarregadu Negosiu Estranjeiru Índia mai Timor Leste, Arindam Benerjee, hodi koalia assuntu bilateral entre Timor Leste ho India.
Bainhira remata enkontru Enkarregadu Negosiu Estranjeiru Índia mai Timor Leste, Arindam Benerjee ba jornalista sira iha Palasiu Prezidensial, Nicolau Lobato, Bairo Pite, Dili, Kinta (21/11/2024) hatete, ohin hasoru malu ho Prezidente Republika hodi koalia assuntu bilateral.
“Topiku neebe koalia ohin kobre ita nia relasaun bilateral no saida mak halo iha futuru, saida mak ita propoin atu halo hamutuk entre nasaun rua nee. Tan nee mak liu husi reuniaun primeiru ho Prezidente Republika,” katak Enkaregadu India nee.
Hasoru malu ho Prezidente Republika José Ramos Horta laos koalia assuntu bilateral deit, maibe diskuti mos kona-ba asuntu oin-oin, no oinsa mak bele servisu hamutuk diak liu tan iha futuru.
Nunee kona-ba assuntu bilateral entre nasaun rua sei foka ba iha assuntu sira hanesan Saude nian kona-ba dijitalizasaun, no topiku seluk tan.
Iha biban nee, Prezidente Republika, José Ramos Horta hatoo benvindu ba Enkarregadu Negosiu Estranjeiru Índia mai Timor Leste, Arindam Benerjee, hodi mai halao enkontru ho Prezidente Republika hodi koalia assuntu bilateral nasaun rua no oinsa ba mak ba oin bele serbisu hamutuk diak liu tan iha Futuru.
No iha enkontru nee koalia mos konaba vizita neebe Prezidente Republika halo ho India, aleinde nee koalia mos kona ba vizita neebe antes nee Prezidente India mai Timor Leste oinsa mak bele hametin relasaun rai rua iha futuru.
(eme)
