DILI, STLTIMORLESTE.com – Prezidente Republika (PR), Jose Ramos Horta halao enkontru ho membru Konselhu Superior Defeza no Seguransa (KSDS), hodi kolia kona-ba oinsa hametin seguransa iha rai laran.
Bainhira remata halao enkontru, portavos Konselhu Superior Defeza no Seguransa, João Aparicio Guterres ba jornalista sira iha Palasiu Prezidensial, Nicolau Lobato, Bairo Pite, Dili, Segunda nee (07/04/2025) hatete, ohin Prezidente Republika Jose Ramos Horta halao enkontru ho KSDS, hodi hametin seguransa iha rai laran.
“Prezidente Republika konvoka membru sira hotu husi Konselhu Superior Defeza no Seguransa ba loron ohin ho ajenda ida deit, atu haree hamutuk knaar esensial husi institusoens estadu nia hanesan F-FDTL, PNTL no PSIK nian kona-ba kontrolu armamentu imosoens, iha parte ida atu hametin diak liu tan kapasidade hodi garante pas, garante seguransa no establiidade iha rai laran,” dehan João.
Nia dehan, iha enkontru nee koalia mos oinsa garante seguransa ba populasaun no mantein ordem publika iha Timor Leste, no partisipasaun ativa husi sidadaun sira hotu ba seguransa nasional.
Nunee mos aspetu ida neebe importante liu iha reuniaun nee mak koalia kona-ba kontrolu ida rigorozu tebes kona-ba uzu de armas no koordenasaun ba alto nivel, no parte seluk realsa mos treinamentu ho kapasitasaun institusoens tolu nee. Institusoens estadu nian hanesan F-FDTL, PNTL no PSIK tenke iha etika kuandu uza kilat armamentu.
Nia hatete, lei la autoriza atu koalia sai rezultadu enkontru Konselhu Superior Defeza no Seguransa, maibe importante mak garante seguransa rai laran nia no garante integridade operasoens militar nia, no garante komprimentu normas legais rai laran nia nomos internasionais kona-ba seguransa no direitus umanus.
Membru Konselhu Superior Defeza no Seguransa neebe mak partisipa iha reuniaun nee mak hanesan Primeiru Ministru, Kay Rala Xanana Gusmão, Komandante Jeral PNTL Komisariu Jeral Henrique da Costa, Ministru justisa, Sergio Hornai, Ministru Defeza Contra almirante Donanciano do Rosario Gomes, Ministru Interior, Diretor Jeral Servisu Nasional Intelejensia Longuinhos Monteiro, Reprezenta Parlamentu Nasional Deputadu David Dias Mandati, Julio Tomas Pinto no partisipante seluk tan.
(eme)
