DILI, STLTIMORLESTE.com – Prezidente Republika (PR), Jose Ramos Horta halo enkontru ho Sekretaria Jeral (SekJer) husi Konferensia Nasões Unidas nian kona-ba Komersiu no Dezenvolvimentu (UNCTAD), Rebeca Grynspan, iha ambitu reuniaun anual husi Forum Ekonomiku Mundial iha Davos.
Durante enkontru nee, Xefe Estadu destaka relasaun profisional neebe naruk ona ho Rebeca Grynspan, neebe mai husi Kosta Rika no konsideradu hanesan kandidata forte ba kargu Sekretaria-Jeral ONU, no rekonese nia hanesan kolega ho reputasaun aas no referensia internasional iha area dezenvolvimentu global.
Bainhira remata halo enkontru Prezidente Republika Jose Ramos Horta ba jornalista iha Davos Suisa Kinta kalan (22/01/2026) hatete, halo enkontru ho Rebeca Grynspan, koalia konaba Rebeca atu kandidata aan ba Sekretaria Jeral.
“Senhora rebeca nia kandidata aan ba sekretariu jeral buat ofisial ona laos segredu senhora nee husi kosta Rika Governu propoin nia kandidata sekretaria jeral ba perido 2027 tinan 5 eleisaun nee sei akontese iha tinan ida nee nia laran semak manan hahu mandatu 1 janeiru 2027,” dehan Prezidente Republika.
Prezidente Republika hatete Semhora Rebeca esperensia klean naruk tebes nia uluk ministra finansas fo susesu boot iha kosta Rika iha tinan lubuk nia laran.
“Nia hau koinese diak kleur ona, hau apoiu nia 100% ba Sekretaria Jeral, alende ke hahu nasoens unidas tinan 80 ona laiha sekretaria jeral feto agora tinan nee ba oin 2027 hau hanoin tenke fo oportunidade ba feto ida, feto neebe iha esperensia matenek, “ dehan PR Horta.
Diskusaun iha reuniaun nee foka ba situasaun komersiu mundial neebe sai komplika liutan, no mos reduksaun boot iha orsamentu ajuda internasional husi doador tradisional sira iha Europa no Amerika Norte. Prezidente Ramos Horta observa katak, maski nasaun barak iha dezenvolvimentu sei enfrenta difikuldade tanba mudansa finanseira sira-nee, Timor Leste hela iha situasaun estavel, tanba forsa Fundu Petrolíferu neebe kontinua finansa orsamentu nasional no sai hanesan protesaun (amortizador) kontra volatilidade ekonomia global.
Enkontru nee mos serve hanesan oportunidade ida atu hametin lasu koperasaun entre Timor-Leste ho UNCTAD, afirma fila-fali kompromisu nasaun nian ho parseria estratejika internasional sira. Prezidente sublina katak importante atu manten parsería institusional neebe forte, hodi garante katak nasaun kiik sira, hanesan Timor Leste, bele kontinua enfrenta dezafiu komersiu internasional no aselera kresimentu ekonomiku iha rai laran liuhusi kooperasaun global ida neebe metin no orientada ba rezultadu.
(eme)
