DILI, STLTIMORLESTE.com – Prezidente Republika (PR), Jose Ramos Horta entrega sasan eletroniku ba instituisaun media, nunee bele fasilita jornalista sira hodi halao servisu iha terenu.
Prezidente Republika, Jose Ramos Horta liu husi nia diskursu iha palasiu Prezidensial, Nicolau Lobato, Bairo Pite, Dili, Kuarta nee (16/04/2025) hatete, fahe material eletronika sira nee ba instituisaun media sira nunee bele fasilita jornalista sira hodi halao servisu iha terenu.
Horta dehan, nee laos Prezidente mak oferese maibe Prezidente mak husu pedidu ba parseru sira, husu lapto, desktop, nomos ropa lubuk ida maibe ropa kualidade, laos ropa sira 1 dolar nia nee, maibe ropa nee kualidade duni laos primeira vez ho Japaun, maibe tinan sira nee fahe tiha neebe mak apoiu husi Koreia.
Prezidente Republika dehan, fahe material sira nee tanba Prezidente rasik halo observasaun media sira hasoru hela difikuldade, tanba nee apoiu nunee fasilita jornalista sira fasil halo servisu.
“Hau fahe laptop ba imi, hau hatene jornalista sira presiza laptop hodi hakerek notisia, tanba jornalista kiak aat los, RRTL sorte tanba nee estadu nia, GMN Jorge Serrano ema riku boot ida, maibe ba media seluk araska, no jornalista araska, kuitadu ba media seluk nee dala ruma atu han deit mos osan laiha, tanba nee mak hau oferese,” dehan PR, Horta.
Prezidente Republika hatete, dala barak Prezidente Republika tula laptop 6 ka 7 iha kareta laran ba fatin fatin maibe nein media ida hatene no foin lalais mos Prezidente ba iha UNITAL lori laptop ba husu estudante sira neebe presiza laptop, Prezidente entrega direita ba estudante sira duke ba universidade mak deside fali estudante.
“Hau koalia ho joven sira hau oferese laptop, hau nia kriteria mak nee, primeiru oferese prioridade ba feto, nee feto labele husu perguntas, prioridade primeiru hau husu o estuda saida, iha tinan lubuk ida halao estudu medisina, mediku, ekonomia buat sira nee primeiru mak hau husu kedas o estuda saida, hau la fo humanity sospol ka,” katak PR Horta.
Nia dehan, bainhira Prezidente fahe laptop ba estudante sira husu tuir inan aman servisu saida no se mak tau matan ba eskola no karik presiza laptop prezidente entrega direita kedas ba estudante sira.
Sasan neebe mak oferese husi Prezidente Republika ba media sira mak hanesan laptop rua, desktop rua, layar komputador rua no printer ida, laptop neebe oferese ba instituisaun sei entrega ba jornalista destadu hodi uza hakerek notisia, no sasan seluk entrega ba instituisaun idak-idak.
Media neebe mak simu sasan husi Prezidente Republika mak hanesan Media STL, GMN, RTTL, TVE, Timor Post, SMNEWS, Dili Post no Max Stahl.
(eme)
