DILI, STLTIMORLESTE.com – Prezidente Republika Jose Ramos Horta entrega premio direitus umanus (DH), Sergio Vieira de Mello edisaun ba da-18, ba vensendor nain 6.
Liafuan nee haktuir husi Prezidente Republika Jose Ramos Horta, liu husi nia diskursu iha Palasiu Prezidensial Nicolau Lobato, Bairo Pite, Kuarta (10/12/2025).
Nia hatete, serimonia entrega premiu Direitus Umanus Sergio Vieira de Mello nee hahu kedas iha premeiru mandatu.
Premiu Direitus Umanus Sergio Vieira de Mello nuudar inisiativa neebe lansa iha tinan 2008 husi Prezidente Repúblika, J. Ramos-Horta, ho objetivu atu rekonese kontribuisaun husi sidadaun Timoroan, sidadaun estranjeiru, organizasaun governamental ka naun-governamental sira, ba prosesu promosaun, protesaun no defeza direitus umanus iha TL.
Premiu ida nee fo tinan-tinan husi Prezidente Repúblika iha loron 10 de Dezembru, data adosaun deklarasaun universal direitus umanus husi Asembleia Jeral Nasoins Unidas, nuudar Loron Internasional Direitus Umanus nian.
“Premiu sira nee fo iha kategoria rua neebe diferente, maka Iha Direitu Sivíl no Polítiku, neebe fo ba indivíduu no organizasaun sira neebe fo kontribuisaun notavel ba promosaun no protesaun direitu sivíl no polítiku sira iha nasaun. Iha direitu ekonomiku, sosial no kultural, atribui ba sira neebe maka fo ona kontribuisaun signifikativu ba promosaun no defeza direitu ekonomiku, sosial no kultural. Vensedor sira nee hili tuir prosesu avaliasaun ida-neebe rigorozu husi konsellu onra, neebe halo analiza ba aplikasaun sira no halao vizita verifikasaun iha fatin ba kandidatura sira neebe tama ona iha lista badak,” dehan PR Horta.
Premiu nee fo tuir dekretu Prezidente Republika Nu. 129/2025, pessoal no organizasaun tuir mai nee mak simu Premiu Direitus Umanus “Sergio Vieira de Mello” ba Edisaun da-18 Kategoria I: Direitu Sivíl no Polítiku Isabel Antonia da Costa Galhos, Me. Leonie Manalu, FCJM, Julião Cardoso.
Kategoria II Direitu Ekonomiku, Sosial, no Kultural Kooperativa Comsoi, Grupo Monocura, Assosiasaun Esperansa Feto Difisiensia
“Iha aniversariu Deklarasaun Universal Direitus Umanus, hanesan onra ba ita atu rekonese pessoal sira neebe aten-barani no organizasaun sira neebe dedikadu,” afirma Prezidente Ramos Horta.
Prezidente dehan sira nia kompromisu metin ba justisa, dignidade no igualdade mak fundamentu ba demokrasia nasaun nian no esperansa ba ita nia futuru. Sira reprezenta duni espíritu Sergio Vieira de Mello, neebe ninia legadu kontinua inspira esforsu koletivu ba Timor Leste ida neebe justu liu.
Bazea ba Dekretu-Lei No. 15/2009 loron 18 de Marsu, vensedor ida-idak simu sertifikadu no premiu osan hamutuk US$10,000.
Jornalista: Emerenciana Pinto
Editora: Domingas Gomes
