DILI, STLTIMORLESTE.com – Prezidente Republika (PR), Jose Ramos Horta entrega sertifikadu rekonhesimentu ba Brigada Mediku Kubana nain 66 neebe durante nee didika sira nia aan iha Timor Leste.
Prezidente Republika Jose Ramos Horta entrega sertifikadu rekonhesimentu ba mediku Brigada Medika Kubana nain 66 neebe remata sira nia misaun tinan 2 iha TL. Serimonia nee halao iha Galeria Memoria Viva iha Bairo Farol, Dili.
Serimonia Rekonhesimentu ida nee rekonhese servisu esepsional husi profisional saude sira neebe fornese ona kuidadu mediku espesializadu iha munisípiu hotu iha TL dezde tinan 2023. Sira nia kontribuisaun laos deit kuidadu direta ba pasiente maibe inklui mos formasaun importante ba doutor, enfermeiru no tekniku Timoroan sira iha estabelesimentu saude oin-oin no iha Fakuldade Medisina Universidade Nasional Timor Leste (UNTL).
Liu husi Diskursu iha Galeria Memoria Viva iha Bairo Farol, Dili, Kinta lokraik (10/04/2025), Prezidente Ramos Horta espresa agradesimentu profundu nasaun nian ba mediku Kubana nain 66 neebe durante nee kontribui makaas ba TL.
”Ohin ita rekonhese laos deit profisional mediku sira ho kualifikasaun, maibe belun lo-loos sira TL nian neebe hatudu ona ideal aas liu husi solidariedade internasional. Doutor nain 66 nee hametin ona ita nia sistema kuidadu saude, salva ona vida sira no transfere konhesimentu folin laek ba ita nia profisional mediku sira. Sira nia dedikasaun hodi servi ita nia komunidade sira neebe remota liu reprezenta amizade neebe metin entre Cuba no Timor Leste,” dehan PR,Horta.
Prezidente dehan, serimonia nee marka kapítulu susesu ida tan iha akordu kooperasaun kuidadu saude neebe kontinua entre Republika Demokratika Timor Leste no Kuba, neebe sai nuudar instrumental ba dezenvolvimentu infraestrutura no kapasidade medika TL nian.
Eventu nee hetan partisipasaun husi Embaixadora Kuba iha TimorLeste, Grisel Alina Aldama Inniss no jestaun senior husi Hospital Nasional Guido Valadares (HNGV).
Nunee mos Embaixadora Kuba iha Timor Leste, Grisel Alina Aldama Inniss hatoo agradese ba Prezidente Republika Jose Ramos Horta nomos Governu Timor Leste neebe mak entrega ona sertifikadu rekonhesimentu ba mediku Kubana nain 66.
“Hau hakarak hahu hodi agradese ita boot sira nia prezensa no esplika katak ba Kuba nee hanesan onra ida no ksolok ida atu fahe momentu importante ida nee ho ita boot sira. Ohin, ami sei aprezenta diploma rekonhesimentu husi Prezidente Republika Timor Leste ba Kolaborador Mediku sira neebe konklui sira nia kompromisu servisu iha rai laran, nuudar parte ida husi selebrasaun Aniversariu Kolaborasaun Kubana ba dala 21 iha Timor Leste,” dehan Embaixadora.
Iha biban nee Embaixador hatete, Kubanu ho Timor Leste sei kontinua hametin projetu ida nee. Liu-liu rekonhese sira neebe lori ona responsabilidade ida nee husi Estadu no Governu Timoroan iha etapa hotu-hotu.
Iha biban nee Embaixadora hatoo agradese ba Prezidente Republika Jose Ramos Horta ho nia gabinete hodi permite realiza eventu despedida ho mediku Kubana neebe kompleta sira nia misaun kolaborativa iha rai laran iha Galeria Memoria Viva.
“Durante tinan sira Kolaborasaun Medika nian, maizumenus pasiente 15.583,225 mak hetan ona tratamentu, inklui partu 108.774, sezariana 13.662, operasaun 159,735, partu moris 96.096, no moris 52.065 maka salva ona. Numeru sira nee ilustra ita-nia mediku sira-nia serbisu neebe louvavel nuudar guardiaun metin ba povu Timor nia saude. Ba buat sira nee hotu, ami hatoo parabens ba ami-nia kuadru mediku sira no ba Kolaborasaun Kubana tomak. neebe serbisu besik ba programa sira neebe kontribui ba povu Timor nia moris diak,” katak nia.
Aleinde nee, formasaun Rekursu Umanu sai hanesan fatuk-inan ida baKolaborasaun, hodi kumpre promesa neebe líder istoriku Revolusaun Kubana nian halo. Fidel Castro Ruz, forma doutor rihun ida ba Timor-Leste. Iha loron 5 fulan Dezembru tinan 2005. Eskola Medisina iha Universidade Nasional Timor Lorosae hetan inaugurasaun. Tinan ida-nee marka aniversariu ba dala 20, ho mediku timoroan hamutuk 1.470 neebe maka hein atu hetan graduasaun. Importante mos atu rekonese katak mediku timoroan nain 47 maka oras nee halao hela espesialidade mediku iha Havana liuhosi fornesedor servisu mediku Kubanu.
(eme)
