DILI, STLTIMORLESTE.com – Prezidente Republika (PR), José Ramos Horta espresa kondolensia ba falesimentu Sua Alteza Prinsipe Karim Aga Khan.
Prezidente Republika, Ramos Horta espresa ninia tristeza profunda ba falesimentu Sua Alteza Prínsipi Karim Aga Khan, líder espiritual husi komunidade musulmanu Ismaili no líder umanitariu neebe konhesidu.
Iha karta kondolensia neebe hatoo ba Sua Alteza Prínsipi Rahim Aga Khan, iha loron 05 Fevereiru 2025, Prezidente Ramos Horta hateten ho triste simu notisia kona-ba Falesimentu Sua Alteza Prinsipi Karim Aga Khan.
“Ho tristeza boot mak hau simu notísia kona-ba falesimentu Sua Alteza Prínsipi Karim Aga Khan, líder espiritual ida ho matenek notavel, umanista ida ho laran luak estraordinariu, no defensor inkansavel ida ba dezenvolvimentu no dignidade umana iha mundu tomak,” dehan PR Horta husi Komunikadu Neebe STL husi Media PR, Segunda (10/02/2025).
Prezidente Republika dehan, Legadu husi Sua Alteza Prínsipi Karim Aga Khan ultrapasa fronteira no jerasaun sira. Ninia kompromisu atu halakon kiak, promove edukasaun, hametin saude publika, no valoriza kultura sai hanesan testemunha ida ba ninia vizaun no dedikasaun metin ba moris diak umanidade nian.
Nia servisu neebe inkansavel liu husi Rede Dezenvolvimentu Aga Khan sei kontinua inspira líder no sidadaun global sira atu tuir ninia ain-fatin hodi buka mundu ida neebe justu, inkluzivu no prosperu liu.
Prezidente hatoo nia sentidu kondolensia klean ba Prínsipi Rahim Aga Khan, Família Aga Khan, no Komunidade Ismaili iha mundu tomak durante tempu triste ida nee. Prezidente hatoo ninia esperansa katak memória husi ninia legadu estraordinariu lori konfortu no inspirasaun ba ema hotu neebe iha privilejiu atu konhese no servisu hamutuk ho nia.
Sua Alteza Prínsipi Karim Aga Khan servi nuudar Imam hereditariu ba dala 49 husi Musulmanu Xiita Ismaili sira, lidera progresu espiritual no material komunidade nian durante dekada neen. Liuhusi Rede Dezenvolvimentu Aga Khan, nia sai pioneiru ba inisiativa dezenvolvimentu sustentavel neebe hadia ona ema rihun ba rihun nia moris iha mundu dezenvolvimentu nian.
His Highness Prince Rahim Aga Khan passed away peacefully at the age of 88, in Lisbon, Portugal on Tuesday 04th February 2025, surrounded by his family.
Sua Alteza Prínsipi Rahim Aga Khan falesiu ho dame ho idade 88, iha Lisboa, Portugal, iha loron Tersa, 4 Fevereiru 2025, haleu ho ninia família.
(eme)
