DILI, STLTIMORLESTE.com – Prezidente Republika (PR), Jose Ramos Horta hatete, Estadu Unidus Amerika destaka papel esensial nuudar mos papel solidu ho Timor Leste (TL) hahu tempu luta ba independensia.
Prezidente Republika Jose Ramos Horta hatoo kestaun nee bainhira partisipa komemorasaun selebrasaun loron indepedensia Estadu Unidus nia, iha diskursu Prezidente hatete, nasaun rua iha parseria neebe dura.
Tuir Komunikadu neebe STL asesu Sesta (04/07/2025) katak, Prezidente Republika Jose Ramos Horta partisipa iha selebrasaun tinan 248 Independensia Estadus Unidus Amerika nian, neebe halao iha Embaixada Estadus Unidus Amerika nian iha Dili. Iha okaziaun nee, nia hatoo parabens ba povu Amerikanu no reafirma kona-ba amizade no kooperasaun neebe klean no kleur entre Timor Leste no Estadus Unidus.
Durante nia diskursu, Xefe Estadu fo benvindu ba Enkarregadu Negosiu foun EUA nian, Bruce Begnell, no destaka papel esensial Estadus Unidus nian nuudar parseiru solidu, hahu hosi tempu luta ba independensia too prosesu rekonstrusaun nasional.
“apoiu konsistente bipartidariu hosi Kongresu norte-amerikanu no hosi administrasaun sira neebe tuituir malu, hodi konsidera ida-nee fundamental ba dezenvolvimentu institusional no demokratiku Timor Leste nian,” dehan Prezidente Republika.
Xefe Estadu mos elojia impaktu konkretu hosi programa sira kooperasaun EUA nian, ho mensiona espesial Seabees Marina EUA nian, neebe harii ona eskola liu 100 iha nasaun, no serbisu importante husi voluntariu sira Korpu da Pas nian.
Prezidente hanoin hikas ho laran ksolok ninia kompromisu pesoal hodi halo advokasia ba kontinuidade programa sira-nee nian, neebe reprezenta prezensa fízika ida neebe solidu no kompromisu ida neebe dura hosi Estadus Unidus mai Timor Leste.
Hodi taka, Prezidente hatoo nia agradesimentu ba apoiu kontínua no dezeja susesu ba Enkarregadu Negosiu foun, hodi hatutan ho halo komik katak nia sei halo buat hotu atu nia mandatu iha Timor Leste sai agradavel liu tan.
(eme)
