DILI, STLTIMORLESTE.com – Prezidente Republika (PR), Jose Ramos Horta hatoo felisitasaun ba Governu Timor Leste (TL) bele organiza no sai uma nain ba jogu Comunidade do Países de Língua Portuguesa (CPLP) neebe realiza iha Timor Leste.
Prezidente Republika, Jose Ramos Horta hatoo lia hirak nee ba jornalista sira bainhira remata vizita Guinea Bissau no fila hikas mai Timor Leste iha Aeroportu Internasional Nikolao Lobato, Komoro Domingu (20/07/2025).
Prezidente Republika, Jose Ramos Horta hatete, Timor Leste sai uma nain ba Jogu CPLP, ida nee diak tebes.
“Timor Leste sai uma nain ba jogu CPLP diak tebes-tebes, felisita Governu neebe organiza eventu ida nee, eventu boot neebe ema mai husi laos rai CPLP hotu-hotu. Tanba lojistika komplikadu tebes-tebes atu too iha Timor Leste, maibe hanesan esperiensia diak tebes-tebes, marketing diak, promosaun Timor Leste,” dehan Prezidente Republika.
Prezidente Republika hatete, Timor Leste iha esperiensia tanba antes nee mos organiza eventu boot bainhira sua santidade Papa Francisco Vizita mai Timor Leste.
“Ita manan tan esperiensia, organiza eventu boot hanesan uluk Amu Papa Francisco nian, atividade sira seluk-seluk, atividade kultural, desportivu ba sientífiku,” dehan Prezidente Republika.
Xefe Estadu hatete, tinan 2026 Prezidensia Republika parseira Governu sei halo simeira boot iha Timor Leste premiu Nobel, sira mais 10 ona konfirma sei mai, sei too 29 resin liu tan sei mai.
Ho sira nia prezensa diak tebes-tebes liu-liu mundu akademiku ba estudante sira neebe iha oportunidade rai barak laiha, bele tur koalia ho premiu nobel sira iha area siensia.
“Mais atividade seluk tan, ita tama ASEAN, atividade lubuk ida loos neebe ita sei halo neebe dezafia ba ita nia kapasidade,” katak PR Horta.
(eme)
