DILI, STLTIMORLESTE.com – Prezidente Republika (PR), Jose Ramos Horta felisita Sua Santidade Papa Leão XIV neebe foin eleitu.
Prezidente Republika Jose Ramos Horta hatoo ninia felisitasaun kmanek liu ba Sua Santidade Papa Leão XIV ba ninia eleisaun istoriku nuudar Bispu Roma ba da-267 no Sumo Pontífise Supremu Igreja Katolika.
Kardeal Robert Francis Prevost, neebe eleitu nuudar Papa Leão XIV, mak pontífise Agustinianu dahuluk no papa daruak husi Amerika sira. Moris iha Chicago iha tinan 1955, nia serbisu nuudar misionariu iha Peru ba tinan barak, hili dala rua nuudar Prior-Jeral Orden Agustinianu, no serbisu nuudar Bispu Chiclayo molok Papa Francisco nomeia nia nuudar Prefeitu Dikasteriu ba Bispu sira iha tinan 2023 no hili nia sai Kardinal iha tinan 2024.
Iha ninia karta ofisia ba Vatikanu, Prezidente Ramos-Horta rekonese importansia signitkativu husi eleisaun Papa Leão XIV nuudar Papa dahuluk husi Estadus Unidus Amerika, destaka Sua Santidade nia servisu misionariu neebe boot iha America Latina no ninia servisu distinto iha Santa Sé.
Husi Karta ofisial neebe STL asesu Sesta kalan (09/05/2025) Prezidente Republika Jose Ramos Horta hatete, eleisaun sua santidade marka momentu istoriko ba igreja no ba mundu.
“Eleisaun Sua Santidade nian marka momentu istoriku ida ba Igreja no ba mundu tomak”, Prezidente Ramos Horta afirma.
Prezidente dehan Amo Papa Nuudar Amu Papa dahuluk husi Estadus Unidus Amerika, ho esperiensia misionaria klean iha Amerika Latina no servisu pastoral no administrativu neebe klean iha Santa Sé nia laran, Sua Santidade personifika rikusoin husi universalidade Igreja nian no renova esperansa ba lideransa neebe komprometidu ho dialogu, justisa, dame no dignidade umana.
Prezidente espresa ninia admirasaun ba Amu-Papa nia bensaun apostolika dahuluk no ninia kompromisu ba Kreda misionaria ida neebe fo prioridade ba ema kiak sira, harii ponte sira, no promove karidade no enkontru fraternu.
Timor Leste, nasaun predominantemente Katolika, hamutuk ho komunidade Katolika global selebra nomeasaun i signifikativa ida nee.
Prezidente garante ona ba Sua Santidade Timor Leste nia afetu filial ba Sé Apostolika no entrega ministeriu Papa nian ba protesaun husi Nossa Senhora da Conceição Imaculada, Padroeira Timor Leste nian.
Prezidente Ramos Horta hatoo ninia votu sinseru ba Sua Santidade Papa Leão XIV hodi kumpri ninia misaun sagrada nuudar Susesor Pedro nian, Bispu Roma, no Pastor Universal Igreja nian.
(eme)
