DILI, STLTIMORLESTE.com – Prezidente Republika (PR), Jose Ramos Horta fo ondra boot Timor Leste nia distintu Padre nain 2 no fo ondra nasional ba personalidade no organizasaun sira neebe kontribui ba susesu vizita Papa Francisco iha TL.
Prezidente Republika postumu kondekora Grau Insígnia Orden Timor-Leste nian ba distintu Padre nain rua husi Salezianu Don Bosco (SDB), iha okaziaun aniversariu Konsulta Popular nian ba dala 26.
Prezidente mos entrega Medalla Orden Timor Leste, Medalla Meritu, no Sertifikadu Elojia ba Pesoal no Organizasaun sira, ba sira-nia kontribuisaun esepsional ba susesu istoriku vizita Apostolika Dahuluk Sua Santidade Papa Francisco mai TL.
Serimonia nee halao iha Palasiu Prezidensial Nicolao Lobato, Kinta (04/09/2025).
Tuir dekretu Prezidente Republika No. 88/2025, neebe asina iha loron 2 fulan-setembru tinan 2025, Prezidente Ramos-Horta kondekora postumu Grau insígnia Orden Timor-Leste nian ba padre Salezianu Don Bosco (SDB) nain rua, nuudar rekonesimentu ba padre sira-nia servisu klean no dedikadu hodi haburas relasaun istorika entre TL no Vatikanu, neebe sai fundamental hodi promove pas, estabilidade nasional, no dezenvolvimentu. Sira nia esforsu durante moris tomak fo benefísiu no konfortu boot tebes ba sidadaun Timoroan barak.
Padre nain rua husi Salezianu Don Bosco (SDB) mak hanesan, Padre Afonso Nascher, SDB, Padre Luiggi Pietro, SDB.
Aleinde nee tuir dekretu Prezidente Republika No. 89/2025, neebe asina mos iha loron 2 fulan-Setembru tinan 2025, Prezidente Ramos-Horta fo ondra nasional ba pesoal no grupu lubuk ida tanba sira-nia kontribuisaun esepsional ba susesu istoriku vizita Apostolika Sua Santidade Papa Francisco nian mai TL iha fulan-Setembru 2024.
Medalla Orden TL fo ba distintu pesoal nain hitu ba sira-nia lideransa. Medalla Meritu nian fo ba pesoal sivíl no militar nain ruanulu-resin-lima, no Sertifikadu Elojia fo ba ema nain 182 no organizasaun boot oioin, inklui mídia no fornesedor telekomunikasaun sira.
Prezidente Ramos Horta hateten, “Iha loron reflesaun nasional ida nee, ita fo ondra ba pilar fundamental sira ba ita-nia pasadu no mos ba arkitetu dedikadu sira iha ita nia prezente. Naroman fiar nian, kompaixaun, no servisu neebe la para neebe hatudu husi Amo Nascher no Amo Pietro orienta ita-nia povu durante momentu nakukun tebes. Sira nia legadu sempre liga hamutuk iha istoria ita-nia nasaun nian. Ita mos selebra serbisu notavel husi sira neebe simu premiu ba sira-nia esforsu koletivu halo vizita Sua Santidade Papa Francisco nian sai susesu boot tebes. Sira hatudu ba mundu tomak pas, estabilidade, no unidade nasaun Timor nian. Hamutuk, premiu hirak-nee garante katak memoria husi obra diak sira-nee sei kontinua inspira jerasaun Timoroan sira neebe sei mai,” dehan PR Horta.
Serimonia ida-nee sai nuudar momentu ida ba nasaun hodi reflete kona-ba sakrifísiu neebe ema barak halo, husi area hotu-hotu, neebe kontribui ba Timor-Leste nia independensia no espíritu neebe dura.
Jornalista: Emerenciana Pinto
Editora: Domingas Gomes
