DILI, STLTIMORLESTE.com – Prezidente Republika (PR), Jose Ramos Horta fo posse ba Embaixadora Maria de Lurdes Martins de Sousa Bessa asumi kargu nuudar Embaixadora Estraordinariu no Plenipotensiariu ba Reinu Beljika no João Freitas de Câmara nuudar Embaixador Estraordinariu no Plenipotensiariu ba Republika Demokratika Popular Laos.
Prezidente Republika Jose Ramos Horta prezide serimonia tomada de pose ba Embaixador foun Timor Leste nian ba Reinu Beljika no Republika Demokratika Popular Laos iha Palasiu Prezidensial Nicolau Lobato.
Iha biban nee Ministru Negosiu Estranjeiru no Koperasaun (MNEK), Bendito Freitas ba jornalista sira iha Palasiu Prezidensial Nikolao Lobato, Tersa (29/07/2025) hatete, ohin 29 Julhu iha Prezidensia Republika iha serimonia tomada de pose ba embaixador nain rua.
“Nomeasaun ba ita nia embaixador sira nee importante tebes atu kontinua papel diplomasia no politika externa Timor Leste nia neebe ita iha ligasaun ho mundu relasaun multilaterais programa de koperasaun iha nivel hotu hotu bilateral no multilateral importante tebes neebe prinsipalmente uniaun europeia iha papel ida importante, Laos mos iha ita nia relasaun diplomatika neebe harii metin ona,” katak Ministru Negosiu Estranjeiru.
Ministru hatete, embaixador sira nee iha esperensia ona no kareira embaixador nain rua mos iha esperensia barak.
Maria de Lurdes Martins de Sousa Bessa simu pose nuudar Embaixadora Estraordinariu no Plenipotensiariu ba Reinu Beljika. Bessa sai diplomata distintu ida, ho esperiensia barak iha area polítika, diplomatika no edukasaun.
Antes nee nia okupa kargu hanesan Visi Ministra Edukasaun no Kultura (2017–2018), Membru Parlamentu Nasional (2012–2017) no Embaixador ba Suisa (2021–2024). Nia mos servisu nuudar Asistente Polítiku ba UNTAET, Asistente Pessoal ba eis-Prezidente Xanana Gusmão, no Asistente Polítika iha Embaixada EUA iha Timor Leste. Ho nia kontribuisuun, Prezidente Ramos-Horta kondekora ba nia Grau Kolar Orden Timor-Leste 2024. Defensora ida ba direitu feto no juventude, nia autor ba livru “Loron Ida” no servisu ho organizasaun hanesan Fundasaun Alola hodi promove kauza sosial sira.
No João Freitas de Câmara simu pose nuudar Embaixador Estraordinariu no Plenipotensiariu ba Republika Demokratika Popular Laos. Câmara antes nee servisu nuudar Embaixador ba Tailandia, Kamboja, Laos no Mianmar no Reprezentante Permanente Timor Leste nian ba UNESCAP. Nia kaer pozisaun xave sira iha Ministeriu Negosius Estranjeirus, inklui Diretor Jeral ba Azia-Pasífiku no Sekretariu-Jeral.
Iha 2024, nia nomeadu nuudar Xefe Protokolu Estadu hodi jere vizita ofisial sira inklui vizita sira husi Sekretariu-Jeral ONU no Papa Francisco. Nia kontinua serbí nuudar Sekretariu-Jeral, ho dedikasaun ba diplomasia.
Prezidente Republika Jose Ramos Horta hatete, nomeasaun sira nee reafirma Timor Leste nia kompromisu hodi hametin parseria global sira. Embaixador rua nee lori esperiensia no dedikasaun neebe boot ba sira nia kargu foun, hodi garante promosaun ba pas, kooperasaun no dezenvolvimentu mutuu.
“Timor Leste nia misaun diplomatika sira importante tebes atu promove parseria internasional sira neebe forte. Hau iha konfiansa katak Embaixadora Bessa no Embaixador Câmara sei serbi ho exelensia, hodi hametin liutan ita nia relasaun sira ho Beljika no Laos, no tane aas valor sira ita nia nasaun nian,” afirma Prezidente Ramos Horta.
Prezidente hatoo agradesimentu ba embaixador sesante sira-nia servisu no oferese apoiu tomak ba Embaixador foun sira bainhira sira asume sira nia funsaun.
(eme)
