DILI, STLTIMORLESTE.com – Prezidente Republika (PR), Jose Ramos fo pose ba Maria Terezinha da Silva Viegas asumi kargu nuudar Embaixadora Timor Leste (TL) ba Japaun.
Prezidente Republika, Jose Ramos Horta prezide serimonia tomada pose ba Maria Terezinha da Silva Viegas, nuudar Embaixadora Extraordinaria no Plenipotensiaria foun Timor Leste nian ba Japaun.
Serimonia tomada pose halao iha Palasiu Prezidensial, Nicolau Lobato, Segunda (18/08/2025) marka pasu signifikativu ida hodi hametin parseria estratejika entre Timor-Leste no Japaun.
Embaixadora Viegas distinta líder timoroan, dedika ona ninia karreira ba servisu publiku no lideransa parlamentar. Nia servisu ona iha Parlamentu Nasional Timor-Leste nian iha lejislatura oioin, inklui nuudar Visi Prezidente ba Parlamentu Nasional (2023–2028), Sekretaria Estadu ba Asuntu Parlamentar (2012–2017), membru husi komisaun xave sira parlamentar nian, no partisipasaun ativu iha forum internasional sira hanesan AP-CPLP, iha neebe nia lidera ona enkontru sira iha Portugal, Mozambique no Cabo Verde.
Defensora komprometida ida ba diplomasia no dezenvolvimentu, nia envolve mos iha inisiativa sira direitus umanus nian no kooperasaun parlamentar, hodi reforsa ligasaun global Timor Leste nian.
Iha serimonia pose Prezidente Republika, Ramos Horta hateten, Embaixadora Viegas nia lideransa sei hametin liutan amizade neebe dura entre Timor-Leste no Japaun.
“Ita nia nasaun sira iha ligasaun forte ida neebe harii liuhusi Japaun nia apoiu metin ba ita-nia dezenvolvimentuhusi infraestrutura krítiku ba kapital umanu. Enkuantu ita eleva ita-nia Parseria Komprensivu, ita hein atu avansa prioridade komun sira, inklui kresimentu sustentavel, investimentu husi setor privadu, no estabilidade rejional,” dehan PR, Horta.
Aleinde nee dezde estabelese relasaun diplomatika iha tinan 2002, Timor-Leste no Japaun harii ona parseria forte bazeia ba respeitu ba malu no valor komun sira nuudar nasaun marítima ho istoria reziliensia. Japaun sai hanesan apoiante prinsipal ba Timor-Leste nia dezenvolvimentu, hodi fornese asistensia iha infraestrutura, kuidadu saude, edukasaun, no redusaun risku dezastre liuhusi JICA. Projetu boot sira inklui atualizasaun ba Aeroportu Internasional Prezidente Nicolau Lobato, Estrada Nasional No. 1, no Ponte Comoro, hamutuk ho inisiativa sira iha agrikultura, peska, enerjia renovavel, no Kooperasaun Defeza. Kolaborasaun resente inklui espansaun Ospital Nasional Guido Valadares, investimentu Tsuneishi Shipbuilding nian iha setor marítimu Timor-Leste, INPEX nia envolvimentu iha dezenvolvimentu enerjetiku, no Japaun mos apoia Timor Leste nia adezaun ba ASEAN. Japaun nafatin nuudar parseiru neebe vital iha Timor-Leste nia esforsu dezenvolvimentu sustentavel no integrasaun rejional.
Prezidente Republika, Ramos Horta espresa konfiansa katak, nomeasaun Embaixadora Maria Terezinha da Silva Viegas sei eleva no fortalese ligasaun amizade no kooperasaun entre Timor-Leste no Japaun.
Visi Ministra Negosiu Estranjeiru Asuntu ASEAN, Milena Rangel hatete, ohin halibur hamutuk iha palasiu Prezidensial, hodi asiste Prezidente Republika fo pose ba Embaixadora TL ba Japaun.
“Ohin dadersan ita mai akompaña aprezentasaun kredensial, toma de posse ba Maria Terezinha Viegas Embaixadora ba Japaun, hodi troka Embaixadora anterior Ilidio da Costa,” katak Visi Ministra, Milena.
Visi Ministra nee hatutan, Embaixadora Maria Terezinha Viegas sei ezerse nia kargu hanesan Embaixadora foun ba Japaun durante tinan tolu, sei reprezenta nasaun, atu halo kontinuasaun ba kooperasaun sira neebe eziste ona entre Timor-Leste ho Japaun, hanoin tanba kooperasaun foun aban bainrua nian entre Timor-Leste ho Japaun konkorda hamutuk bele halao iha futuru.
Prosesu maizu menus fulan ida hanesan nee, prosesu lao hela, pelumenus fulan Setembru hanesan nee Embaixadora Maria Terezinha Viegas bele halao ona nia knaar iha Japaun.
(eme)
