DILI, STLTIMORLESTE.com – Prezidente Republika (PR), Jose Ramos Horta fo pose ba Regina de Jesus de Sousa nuudar Visi Ministra Finansas foun ba IX Governu Konstitusional.
Prezidente Republika Jose Ramos Horta fo pose ba Regina de Jesus de Sousa nuudar Visi Ministra Finansas foun ba IX Governu Konstitusional. Serimonia nee halao iha Palsiu Prezidensil Nicolau Lobato.
Bainhira remata, Primeiru Ministru Kay Rala Xanana Gusmão ba jornalista iha Palasiu Prezidensial Nicolau Lobato, Bairo Pite, Kinta (12/02/2026) hatete, ohin Prezidente Republika Jose Ramos Horta fo pose ba Vsi Ministra Finansas foun.
“Ohin Prezidente fo pose ba Visi Ministra Finansas foun, lori fulan ida, hau koalia ho Felicia nia dehan hau sente aan dehan labele nee mak hau husu demisaun nee, neebe hau fiar katak senhora Visi Ministra Finansas foun Sejuina sei servisu diak tanba hau konhese diak kompotente tebes,” dehan Primeiru Ministru.
Aleinde nee nomeasaun nee formaliza tuir Dekretu Prezidente Republika Nu. 17/2026. Regina de Jesus de Sousa troka eis Visi Ministra Finansas, Felícia Claudinanda Cruz Carvalho.
Regina de Jesus de Sousa nuudar espesialista finansas ho esperiensia liu tinan 20 iha Ministeriu Finansas. Nia lori konhesimentu tekniku nivel aas iha Jestaun Finansas Publikas (PFM) ba nia pozisaun foun. Nuudar eis Diretora Jeral Tezouru nian, nia sai instrumental hodi asegura integridade, efisiensia no transparensia ba sistema finanseiru estadu nian.
Ninia lideransa kobre area estratejiku sira inklui kontabilidade nasional, operasaun tezouru nian, ezekusaun orsamental no jestaun pagamentu, neebe diretamente apoia polítika governu no reforma Jestaun Finansas Publikas nian. Konhesidu ho nia abilidade analítika no konhesimentu konformidade, nia iha istoria forte ida kona-ba harii ekipa, promove kooperasaun entre ajensia sira no fo konselhu ba orgaun estadu sira kona-ba asuntu orsamental sira, nia esperiensia aumenta ona liu husi formasaun internasional avansadu ho FMI no ADB, neebe foka ba modernizasaun tezouru, sustentabilidade dívida no polítika fiskal.
Iha serimonia pose nee Prezidente Ramos Horta afirma konfiansa tomak ba Visi Ministra Finasas sei lori nia perisia ba esepsional.
“Hau iha konfiansa tomak katak Sra. Regina de Jesus de Sousa sei lori nia perísia esepsional, integridade neebe metin, no kompromisu klean ba servisu publiku ba papel vital ida nee. Ninia lideransa sei sai krusial hodi promove estabilidade ekonomika ita nia nasaun nian, garante disiplina fiskal, no reforsa fundasaun governasaun diak ba benefísiu povu Timoroan tomak nian.” Katak PR Horta.
Serimonia nee marka transferensia formal ba knaar sira no inísiu mandatu Visi Ministra foun nian.
(eme)
