DILI, STLTIMORLESTE.com – Prezidente Republika (PR), Jose Ramos Horta fo pose ba Dr Nelson de Carvalho asumi kargu nuudar Prokurador Jeral Republika (PJR), hodi troka PJR Sesante Alfonso Lopez.
Liu husi diskursu iha Palasiu Prezidensial Nikolao Lobato, Bairo Pite Tersa nee (13/05/2025) Prezidente Republika Jose Ramos Horta hatoo kongratulasaun ba Dr Nelson de Carvalho neebe mak foin simu pose hodi asumi kargu nuudar PJR.
“Hau kongratula PJR Dr. Nelson de Carvalho, jurista ida neebe nia kareira profisional marka ho tinan 23 servisu publiku nian neebe meritoriu, ezerse ho dedikasaun no exelensia iha ambitu judisiariu nian pilar esensial no indispensavel ida husi Estadu Direitu Demokratiku,” dehan Prezidente Republika.
Prezidente dehan, Nelson Carvalho nia kareira profisional, nia hetan rekonhesimentu nuudar orador neebe kualifikadu tebes iha eventu internasional oin-oin. Ninia kareira nuudar orador hahu durante mandatu Ana Pessoa nian iha Prokuradoria Jeral Republika, depois kontinua iha eventu relevante sira seluk, tantu nasional no internasional.
Iha sirkunstansia ruma nia la laran ka intimidadu ho konvite sira neebe nia simu, neebe kobre topiku oin-oin iha area Direitu nian. Aprezentasaun badak ida nee konstitui sumariu ida kona-ba biografia Prokurador Jeral nian.
Xefe Estadu dehan, haree ba nia kareira neebe riku ho esperiensia, iha esperansa neebe metin katak nia sei bele hasoru dezafiu sira neebe Ministeriu Publiku hasoru ho determinasaun no matenek.
“Hau konsidera apropriadu no pertinente, iha aktu solene ida nee atu hanoin hikas fali kronolojia husi Prokurador Jeral sira anterior Republika Demokratika Timor Leste nian, no mos baze legal sira neebe apoia sira idak-idak nia nomeasaun,” katak PR Horta.
Nunee mos Prokurador Jeral Republika Nelson de Carvalho hatutan, durante diskursu nia objetivu prinsipal mak durante nia mandatu buka halo rekrutamentu ba prokurador neebe foun para atu servisu iha Ministeriu Publiku.
“Tanba agora daudaun ami falta rekursu umanu alias prokurador la too, tanba nee mak ohin hau hatoo iha nee, iha Primeiru Ministru no membru Governu mos iha nee hotu nunee ba futuru halo tan rekrutamentu ba prokurador sira foun nee tenke extraordinariamente, tanba ami presiza, tanba ita hatene katak ita falta de rekursu umanu,” katak PJR.
Nia hatete, iha nia mandatu sei haree mos krimi sibernetika neebe agora daudaun espalha, tanba nee mak PJR mos iha meius maneira atu bele antisipa ho aktu sira neebe mak relasionadu ho sibernetika.
Nia hatutan, programa prioridade mak oinsa haree liu ba renumeratoriu ba majistradu sira nia nomos ba ofisial justisa tanba sira mak hanesan ausiliar neebe mak servisu ba prokurador sira nomos prinsipal bem estar majistradu nomos ba ofisial justisa sira.
Serimonia pose nee marka prezensa mos husi Prezidente Republika Jose Ramos Horta, Primeiru Ministru Kay Rala Xanana Gusmão, Prezidente Parlamentu Nasional, Prezidente Tribunal Rekursu, Eis-Xefe Orgaun Soberanu sira, Distintu Deputadu Parlamentu Nasional sira, Ministru Justisa, Distintu Membru Governu sira, Juiz no Reprezentante Konselhu Superior Majistratura Judisiariu (CSMJ), Distintu Ministeriu Publiku no Reprezentante Konselhu Superior Servisu Ministeriu Publiku (CSMP), Reprezentante Igreja, Xefe Estadu Maior Jeral FALINTIL-Forsa Defeza Timor Leste (F-FDTL), Komandante Jeral Polísia Nasional Timor Leste (PNTL), Provedoria ba Direitus Umanus no Justisa (PDHJ), Defensor Publiku Jeral, Membru Korpu Diplomatiku, Ajensia Kooperasaun Internasional, Konfisaun Relijioza no Organizasaun Sosiedade Sivíl sira, familia PJR nomos partisipante seluk tan.
(eme)
