DILI, STLTIMORLESTE.com – Prezidente Republika (PR), Jose Ramos Horta hatete, presiza haree ona lei adapta tuir realidade Timor nia, nunee harii ona Tribunal Supremu antes Prezidente nia mandatu remata.
Prezidente Republika Jose Ramos Horta hatoo lia hirak nee ba jornalista sira bainhira remata partisipa serimonia tomada de pose ba Inspetor Xefe Defensoria Publika iha sede Defensoria Publika Balide, Segunda (05/05/2025).
Prezidente Republika hatete, tempu ona atu haree lei hodi adapta realidade Timor Leste nia para harii ona Tribunal Supremu antes Prezidente Republika nia mandatu remata iha tinan 2027.
“Hau hatene ministeriu justisa book aan atu halo rekrutamentu ba setor justisa barak, tanba hau hatene hau akompanha dezde ano jero indepedensia hau akompanha setor justisa hahu tempu UNTAET hahu Juiz Cláudio, momentu neeba balun iha rai laran hakarak hasai tiha nia ona, ezemplu nia moras iha Portugal fulan hira nia laran hau hetan loby husi balun hasai tiha nia tanba nia moras liu fulan 3, maibe hau augenta nia fila mai.
Tinan 20 liu tiha bele hatete balansu pozitivu, iha politizasaun no partidarizasaun tentasaun umanu balun monu ba tentasaun maibe Timor laos uniku ke hetan akuzasaun politizasaun no partidarizasaun, maibe iha mundu nee barak los.
“Maibe ita tenta halo diak liu tan, falta instituisaun ida ke konstituisaun hatete tribunal supremu, hau uluk sempre iha duvida ita iha ona rekursu umanu tribunal supremu ka lae? Hau hanoin too ona tempu, ita haree lei tenke adapta ita nia realidade, adapta ba realidade Timor nia labele kopy paste husi liur, husi liur ita aprende ita haree esperiensia maibe adapta ba rai laran para ita kria harii Tribunal Supremu iha tempu ida nee, tinan ida nee nia laran ou tarde liu 2026 antes hau remata hau nia mandatu iha 2027,” katak PR Horta.
Prezidente Republika hatete, presiza harii ona iha tinan 2026, tanba iha 2027 labele ona.
“Nee mak hau mai apoiu ho kbiit ba Inspetor Xefe ba sira hotu neebe servisu iha nee, iha instituisaun Defensoria Publika,” katak PR Horta.
Aleinde nee oinsa Prezidente nia observasaun ba servisu Defensoria Publika nia durante nee, hatan ba kestaun nee Prezidente Republika hatete, nia lee relatoriu neebe mai husi fontes oin-oin, maibe iha tinan hira nia laran neineik neineik servisu lao diak, maske iha falhansu nee normal, tanba iha fatin hotu mos iha falhansu laos Defensoria Publika mak la diak ou la diak liu.
“Sempre iha frakeza no buat oin-oin, maibe istoria 20 ital anos hatudu ona importante tebes ita hakarak justisa neebe asesivel ba hotu-hotu tenke harii Defensoria Publiku neebe forte ho intensivu material para advogadu sira neebe diak sira hakarak mai servisu iha nee, labele asesor iha ministerial sira seluk asesor Timoroan sira hotu-hotu ho kareta, mais Defensoria Publiku sira sae bisikleta, sae mikrolet,” katak PR Horta.
Prezidente hatete, presiza haree oinsa hadia sira nia kondisaun material, se lae laiha intensivu se mak hakarak mai servisu iha Sefensoria Publiku.
(eme)
