DILI, STLTIMORLESTE.com – Prezidente Republika (PR), Jose Ramos Horta hakarak iha tinan 2026 tenke instala duni Supremu Tribunal Justisa (STJ) iha Timor Leste.
Kestaun nee hatoo husi Prezidente Tribunal Rekursu, Afonso Carmona ba jornalista sira, bainhira remata halo enkontru ho Prezdente Republika Jose Ramos Horta iha Palasiu Prezidensial Nicolau Lobato, Bairo Pite, Kuarta (15/10/2025).
PTR dehan, ohin ohin Prezidente Parlamentu Nasional ho bankada, Ministru Justisa ho Tribunal Rekursu halao enkontru ho Prezidente Republika, Jose Ramos Horta, tanba Xefe Estadu hakarak tinan 2026 tenke instala duni Supremu Tribunal Justisa.
PTR Carmona dehan, tanba nee mak tempu nee badak, hotu-hotu esforsu makaas 18 Maiu 2026 bele instala Supremu Tribunal Justisa.
“Hau mai ho Prezidente Parlamentu Nasional, Bankada sira seluk, ho Ministru Justisa. Ami mai koalia asuntu liga ho instalasaun Supremu Tribunal Justisa, tanba nee mak Prezidente Republika hakarak tinan 2026, ita tenke instala duni, tanba nee mak tempu nee badak, ita hotu-hotu esforsu makaas 18 Maiu 2026 ita bele instala Supremu Tribunal Justisa,” informa PTR, Afonso Carmona.
PTR haktuir tan katak, nunee 2027 liga ho eleisaun neebe la preokupa ho instituisaun nee, neebe Prezidente hasoru atu rezolve tekniku sira liu-liu liga ho funsaun ida-idak nian hanesan Parlamentu Nasional apoiu saida, entaun liga ho lei ruma, maibe sira prontu atu suporta, Ministru Justisa mos liu husi Koordenador iha setor justisa nia mos apoiu.
“Hau hanesan Tribunal kompetensia iha Konselhu nian, nunee saida mak Prezidente Republika nia hanoin, tanba konstituisaun mak dehan ita iha Supremu, tanba nee mak tinan 23 ona, tinan 2026 nee ita tenke konkretiza,” nia dehan.
Nia argumenta, ida nee mak ohin mai hasoru malu, la koalia buat barak, maibe koalia oinsa preparasaun nee, tanba tempu badak nee oinsa parte ida-idak nia funsaun kompetensia atu rezolve, entaun xave iha Tribunal fali, karik iha lei ruma neebe impede lao la diak, entaun tenke konvoka ba Parlamentu Nasional liu husi Ministeriu Justisa aproveita planu asaun orsamentu agora nee, governu mos aprova atu apoiu, Parlamentu Nasional mos apoiu hela hanoin buat hotu-hotu hetan suporta husi instuituisaun estadu nee.
“Tanba nee saida mak ohi ami koalia nee husu ita hotu-hotu, liu-liu instuituisaun relevante atu suporta. Fatin Supremu Tribunal Justisa nee agora dezenhu lao hela, halo iha Tribunal Primeira Instansia nia sorin iha andar lima, maibe planu ida tinan 2026 nee ita uza lao Tribunal Distrital Dili Kolmera, temporariu uza neeba, orsamentu governu aprova agora too ona faze Parlamentu Nasional nia aprovasaun karik finalmente aprova duni, buat hotu-hotu lao diak,” nia hakotu.
Jornalista: Emerenciana Pinto
Editor: Xisto Mendonça
