DILI, STLTIMORLESTE.com – Iha loron Segunda maizumenus tuku 11:45 bainhira Prezidente Republika (PR) Jose Ramos Horta sai husi sala liu minutu 2 vidru odamatan boot tama sai Tribunal Judisial Primeiru Instansia Dili monu tun nakfera halo ema hotu hakfodak.
Tuir observasaun neebe STL hetan bainhira Prezidente Republika Jose Ramos Horta remata abertura debate kona-ba estabelesemimentu Supremu Tribunal Justisa iha salaun Tribunal Judisial Primeiru Instansia Dili, hakat sai husi salaun no sae nia kareta fila fali ba office liu minutu 2 vidru boot odamata tama sai Tribunal Judisial Primeiru Instansia Dili monu tun nakfera halo ema hotu hakfodak, maibe agradese tanba la hakanek ema ruma.
Relasiona ona odamatan monu, jornalista koko konfirma ho Prezidente Tribunal Rekursu, Afonso Carmona mos hakfodak maibe nia resposta katak odamatan nee otomatis maibe taka mate entaun odamatan book aan la diak tenke monu rahun duni.
“Problema nee dehan, dala ruma ema dehan karau nee atu monu ona karik, maibe hanesan nee buat neeba otomatis, agora sira halo mate tiha pois dudu ba mai entaun vidru nee tenkeser nakfera, ohin sira hamate hela,” katak PTR.
Aleinde nee tuir informasaun neebe mak STL asesu katak, vidru nee monu dala rua ona, informasaun nee los ka lae? Hatan ba kestaun nee Prezidente Tribunal Rekursu hatete, los duni maibe uluk nee polisia balun mak taka tiha, tanba nee vidru nee labele halai, maibe kuandu polisia ses odamatan rahun kedas.
“Heixa ida uluk nee polisia mak taka tiha neebe nia labele halai ba mai, entaun polisia ses nia rahun kedas, agora nee mos pasti halo buat hanesan nee,” dehan PTR.
Ho odamata tama sai Tribunal Judisial Primeiru Instansia Dili neebe mak monu rahun dala rua karik nee tanba kompanhia neebe mak halo mak laiha kualidade ka oinsa? Hatan ba kestaun nee PTR dehan, informasaun hanesan nee lalos, maibe ema neebe utiliza mak sala.
Prezidente Tribunal Rekursu dehan, utiliza sala tanba odamatan nee halai ba maibe taka metin entaun tenke monu.
Aleinde nee, bainhira Prezidente Republika Jose Ramos Horta rasik sai husi odamatan nee liu minutu 2 foin monu tun, maibe ida hanesan nee sei fo ameasa ba funsionariu sira ka lae? Hatan ba kestaun nee PTR hatete, la fo ameasa maibe ema mak estraga.
“La fo ameasa, funsionariu sira mai soke vidru ga, neebe ba hau buat ida vidru nee laos kestaun importante,” hakotu nia.
(eme)
