DAVOS, STLTIMORLESTE.com – Prezidente Republika (PR, Jose Ramos Horta hasoru malu ho Alex Soros, milionariu Amerikanu ida, no nia mos ema boot ba Open Society Foundation (OSF), hodi husu tulun nunee bele apoiu media iha Timor Leste neebe foin lalais husu ajuda ba Prezidente Republika.
Prezidente Republika Jose Ramos Horta hasoru Alex Soros iha Davos, Suisa, fatin World Economic Forum iha loron Kuarta (21/01/2026) bainhira remata partisipa dialogu estratejiku nivel aas nian, inklui Enkontru Informal ida hosi Líder Ekonomiku Mundial sira (IGWEL) kona-ba Restaura Espíritu Dialogu iha mundu neebe fahe malu no dialogu ho parte interesada sira ho títulu, “Tau Empreendedor sira iha Fatin neebe Merkadu laiha”.
Bainhira remata hasoru malu, Prezidente Republika Jose Ramos Horta ba jornalista iha Davos, Kuarta (21/01/2026) hatete, hasoru malu ho Alex Soros nia ema neebe sempre apoiu liberdade imprensa, tanba nee Prezidente mos aproveita husu apoiu ruma nunee bele tulun media iha Timor Leste neebe presiza tebes tulun.
“Alex Soros nia ema boot Open Society Foundation (OSF), nia pai mak George Soros, milionariu konhesidu iha Amerikanu no uluk sempre apoiu Timor Leste, no sira apoiu liberdade imprensa iha mundu tomak, entaun hau husu apoiu ba nia para favor fo apoiu ba media iha Timor, sira nia difikuldade oin-oin,” dehan Prezidente Republika.
Prezidente Republika hatete antes nee Prezidente haruka ona karta ba Alex Soros, karta nee ba ona besik fulan ida ona maibe seidauk simu tanba nee Prezidente sei fo karta nee direitamente ba nia.
“Entau hau sei kaer karta nee haruka direitamente ba nia WhatsApp nia sei fo ajuda, hau hakarak nia mai vizita Timor Leste, para ita rekonhese, se mai, nia rasik mak mai, nia pai labele mai tanba idade ona, no nia hakarak vizita duni, tempu besik nia sei ba,” katak Prezidente Republika.
Prezidente Republika hatete bainhira Prezidente hasoru ho Alex hodi husu apoiu tulun media balun iha Timor Leste hatan ba ida nee Alex resposta pozitivu atu apoiu media Timor.
“Nia garantidu ona, hau tenke haruka fila fali pedidu neebe jornalista sira halo nee, no entrega imi nia nesesidade mai ho lista kompletu hau halo karta haruka ba nia, maibe seidauk simu maske iha ona nia office, maibe nia seidauk haree tanba nee hau fila ba Dili, media sira kopia hau fo husi WhatsApp no tempu badak nia sei haree fo aprovasaun kedas,” katak Prezidente Republika.
Media neebe antes nee hatoo proposta husu apoiu ba Prezidente Republika mak hanesan media Suara Timor Lorosae (STL), Timor Post, Independente, no Dili Post.
(eme)
