DILI, STLTIMORLESTE.com – Prezidente Republika (PR) José Ramos Horta hasoru malu ho delegasaun Institutu Finansa no Sustentabilidade (IFS) hodi diskuti asuntu Turizmu Verde.
Iha loron Segunda nee (14/10/2024) Prezidente Republika José Ramos Horta hasoru malu ho delegasaun husi Institutu Finansa no Sustentabilidade (IFS) iha Palasiu Prezidensial Nicolau Lobato, Delegasaun ho membru nain 14 neebe espesializa iha turizmu no infraestrutura verde lidera husi Fundador no Prezidente IFS Ma Jun, peritu rekonhesidu ida iha finansa verde husi Xina.
Iha sorumutu ida nee, Prezidente Ramos Horta ho Ma Jun, hamutuk ho delegasaun IFS, envolve iha diskusaun kona-ba viabilidade atu dezenvolve estratejia turizmu verde komprensivu ida ba Timor Leste. Inisiativa ida nee ninia objetivu mak atu promove dezenvolvimentu sustentavel liu husi kriasaun projetu infraestrutura verde no ho karbonu kiik, inklui hotel sira neebe amigavel ba ambiente, sentru komersial sira, terminal kruzeiru sira, no aeroportu sira neebe hadia ona.
“Estratejia turizmu verde ida nee reprezenta oportunidade importante ba Timor Leste atu hatudu ami nia beleza natural, enkuantu garante dezenvolvimentu sustentavel. Ho alinha ho padraun finansa verde internasional, ami koloka ami nia aan nuudar nasaun ho vizaun ba oin neebe komprometidu ba kresimentu neebe esponsavel,” dehan PR Horta.
Inisiativa nee dezena atu atrai investimentu internasional husi fonte oin-oin, inklui banku dezenvolvimentu multilateral sira (MDBs), fundu rikusoin soberanu Xines sira, no emprestador/investidor sira setor privadu nian. Envolvimentu husi autor global sira nee sei sai krusial iha finansiamentu no implementasaun projetu infraestrutura verde sira.
Nia hatete, Institutu Polítika no Asuntu Internasional (IPIA), grupu pensamentu Timoroan neebe lidera husi Fidelis Magalhães mak fasilita prosesu nee. IPIA nia foku prinsipal mak atu dezenvolve estratejia ida ho dalan sira neebe klaru atu asesu ba finansiamentu no aprofunda komprensaun kona-ba mekanizmu finansiamentu verde global sira.
Prezidente Ramos Horta hatutan tan, “Ami agradese ba perísia neebe delegasaun IFS lori mai no servisu makaas husi IPIA. Kolaborasaun nee sei laos deit hasae ita nia setor turizmu, maibe mos estabelese Timor Leste nuudar líder rejional iha dezenvolvimentu sustentavel,” katak Horta.
Prezidente hatudu interese boot, maibe governu mak forma no desidi polítika sira. Hafoin sorumutu nee, Prezidente Ramos Horta sai uma nain ba resepsaun koktel iha Palasiu Nobre hodi simu Ma Jun no delegasaun IFS.
Resepsaun nee hetan partisipasaun husi ofisial governu, reprezentante husi institutu publiku sira, membru korpu diplomatiku, membru IPIA, organizasaun internasional akademia no setor privadu sira.
(eme)
