DILI, STLTIMORLESTE.com – Prezidente Republika (PR), Jose Ramos Horta hasoru malu ho diplomata Timoroan senior neebe mak durante nee hamutuk ho Xefe Estadu hodi koalia kona-ba situasaun TL nomos situasaun internasional.
Prezidente Republika Jose Ramos Horta hatoo kestaun nee ba jornalista sira bainhira remata halo abertura Dili Marathona iha Palasiu Prezidensial Bairo Pite, Sabadu (16/11/2024).
Prezidente Republika hatete, bainhira remata halo abertura ba Dili Marathona sei viajen ba iha Munisipiu Aileu hodi hasoru malu ho diplomata Timoroan senior sira neebe mak durante nee Servisu hamutuk ho Prezidente hahu iha tinan 2000.
“Ohin hanesan informal hau ba hasoru ho diplomatas Timoroan Senior sira neebe hahu ho hau iha 2000 kuandu hau hahu rekrutamentu organiza Ministeriu Estranjeiru sira hahu ho hau, entaun sira diplomata senior iha Postu nuudar Diretor Jeral, nuudar diretor, nuudar embaixador halo enkontru ida ohin ho aban hanesan enkontru informal halimar, han hemu koalia kona-ba situasaun Timor, no situasaun internasional,” katak PR Horta.
Xefe Estadu hatete, hasoru malu ho diplomata Timoroan senior sira iha Munisipiu Aileu hodi koalia kona-ba situasaun rai laran iha Timor Leste nomos situasaun internasional nomos papel Timor Leste nia liga ho CPLP no adezaun ba asean G7+ no buat seluk tan.
Prezidente Republika haktuir, enkontru sira nee informal laos buat ida formal, no sira rasik mak hakarak enkontru nee, tanba nee PR mos konkorda hodi ba hanesan mos fim de semana iha Aileu.
(eme)
