DILI, STLTIMORLESTE.com – Prezidente Republika (PR), Jose Ramos Horta hasoru malu ho Embaixador Timor Leste, Loro Horta ho delegasaun hodi koalia oinsa kompanhia Huahao husi Xina atu halo investimentu iha Timor Leste.
Prezidente Republika Jose Ramos Horta hasoru malu ho Embaixador Timor Leste ba Xina, Loro Horta ho delegasaun Guangxi Huahao International Bussines iha Palasiu Prezidensial hodi koalia kona-ba investimentu neebe Kompanhia nee sei halo iha Timor Leste.
Bainhira remata hasoru malu, Embaixador Timor Leste ba Xina, Loro Horta ba jornalista sira iha Palasiu Prezidensial Nikolao Lobato, Bairo Pite, Tersa (27/05/2025) hatete, enkontru ho Prezidente Republika, Jose Ramos Horta nee oportunidade atu rona proposta, ideia kompanhia Onesy Teknolojia. Teknolojia hanesan konsorsiu, ambrela kompanhia iha kompanhia barak.
“Teknolojia iha interese area barak iha Timor, nomeadamente nee area peska rekursu tasi, iha interese area agrikultura, prinsipalmente foos, mos iha interese barak area mina hanesan manganezu, marmer, no rekursu naturais, no mos Kompanhia boot iha Xina interese area infraestrutura,” dehan Embaixador.
Embaixador dehan, pozisaun Governu Timor Leste sempre klaru investimentu Xineza, benvindu ba Timor dezde klaru respeita lei ambiente Timor Leste nian.
Prezidente Republika esplika, Timor iha prosesu, la interese husi kompanhia Xina, Australia ka Indonezia mas hakarak halo projetu iha Timor. Klaru Governu iha 100% kompanhia hotu bele konkokore, oferta diak bele manan.
Governu Timor sempre enkoraza, sempre konvida emprezariu Xineza ba halo investimentu iha Timor, maibe Xina laiha tratamentu la interese kompanhia Xina ka Australia no Indonezia.
Nia dehan, bainhira iha regra nee Governu Timor Leste estabelese, entaun agora ekipa kompanhia Xina mai Timor primeiravez ba haree situasaun iha Timor, haree oportunidade Kinta feira ekipa kompanhia Xineza aumenta tekniku ba haree maizumenus ema nain 20 ba haree area peska, agrikultura, infraestrutura no area seluk tan.
Bainhira remata estudu situasaun iha merkadu Timor, depois klaru ba halo proposta ba Governu Timor sei iha oportunidade karik grupu Onesy Teknolojia ba halo investimentu iha Timor.
“Hau dehan dezde hau asumi hau nia pozisaun Embaixador iha Xina tinan 2023, hau nia prioridade atrai investimentu Xineza ba Timor Leste, maibe investimentu nee kria empregu iha Timor. Hau hanoin problema numeru ida iha Timor nee problema dezempregu, joven laiha servisu entaun prioridade hau nian Embaixador sempre buka oportunidade atu atrai investimentu iha Timor, maibe investimentu neebe respeita lei Timor, respeita meiu ambiente,” katak nia.
Nia hatete, prinsipalmente investimentu bele kria empregu ba juventude.
Nia hatete, tinan 2024 Prezidente Republika, Jose Ramos Horta vizita iha Xina primeira vizita estadu ba Xina prioridade Prezidente Republika, Governu Timor Leste area agrikultura, infraestrutura entaun agrikultura prioridade numeru ida.
Investimentu hanesan industria kiik, maibe grupu Onesy Teknolojia area interese numeru ida, area agrikultura no peska.
“Ohin too Timor ekipa Direior sira, loron Kinta-feira too Timor ekipa mais tekniku, hela iha Timor karik semana rua, ba haree situasaun iha Dili, munisípiu no hasoru Ministru Agrikultura, Ministru Komersiu Industria bele haree ona posibilidade atu buka informasaun konkreta haree area investimentu,” katak nia.
Nia hatete, kompanhia sei ba Munisípiu Baukau, Manatuto, Bobonaro, Maliana, Vikeke, zona neebe potensial agrikola no mos area peska fundamentalmente Kosta Sul, mos hanesan ikan mota. Tanba Kompana Onesy Teknolojia esperiensia barak iha Xina.
(eme)
