DILI, STLTIMORLESTE.com – Prezidente Republika (PR), Jose Ramos Horta hasoru malu ho Sekretariu Jeral (SekJer) ASEAN, Kao Kim Hourn, hodi diskute prosesu Timor Leste nia adezaun ba Asosiasaun Nasaun Sudeste Aziátiku (ASEAN).
Tuir Komunikadu neebe STL asesu husi media PR Sesta (24/01/2025) hatete, viajen ba Suisa Prezidente Republika Jose Ramos Horta halao enkontru bilateral ho Sekretariu Jeral ASEAN, Kao Kim Hourn iha Sentru Kongresu Davos, neebe foka liu ba prosesu Timor Leste nian neebe lao hela hodi adere ba Asosiasaun Nasaun Sudeste Aziátiku (ASEAN).
Enkontru neebe halao entre tuku 10:00 no tuku 10:30 dader iha sala bilateral 1.10, koalia kona-ba Timor Leste nia progresu hodi kumpre rekizitu roteiru adezaun ba ASEAN no pasu estratejiku sira tuir mai ba integrasaun tomak.
Topiku xave sira inklui kooperasaun rejional, prezensa diplomatika, no alinamentu ba prazu sira membru nian.
Molok enkontru bilateral, akontese saudasaun trilateral badak ida neebe envolve Prezidente Ramos Horta, Sekretariu Jeral ASEAN nian no Ministru Negosiu Estranjeiru Portugal nian, Paulo Rangel, hodi destaka interese mutuo hodi haburas relasaun estratejiku sira iha Sudeste Aziatiku nia laran no Comunidades dos Países de Língua Portuguesa.
Aleinde nee, Prezidente Republika Ramos Horta halao enkontru informal ho Dr. Ngozi Okonjo-Iweala, DiretOr-Jeral Organizasaun MundiAl KomErsiu (OMK), durante Enkontru AnuAl forum Ekonomiku Mundial.
Prezidente kongratula Okonjo-Iweala ba nia re-nomeasaun ba mandatu daruak, rekonese nia lideransa notavel iha hametin sistema komersiu multilateral. Sira nia dialogu foka liu ba Timor Leste nia kompromisu atu alina polítika nasional sira ho padraun OMK nian hodi maximiza benefísiu sira hosi adezaun organizasional tomak.
Ramos Horta espresa Timor Leste nia hakarak atu hetan nafatin apoiu tekniku no institusional hosi OMK hodi konsolida progresu ekonomiku no promove komersiu inkluzivu, sustentavel hodi kontribui ba dezenvolvimentu nasional no rejional.
Aleinde nee Prezidente Republika enkontru badak ida ho Sua Alteza Real Prínsipe Faisal bin Farhan bin Abdullah Al Saud, Ministru Negosiu Estranjeiru Arabia Saudita
Durante konversa, líder rua nee koalia kona-ba topiku sira neebe iha interese mutuo, inklui oportunidade atu hametin kooperasaun bilateral entre Timor Leste no Arabia Saudita, ho foku ba area sira hanesan dezenvolvimentu sustentavel, investimentu ekonomiku no troka kultural.
Enkontru nee reafirma kompromisu neebe halo hosi nasaun rua iha 2023 hodi promove dialogu no kolaborasaun multilateral hodi rezolve dezafiu global no rejional sira, alina ho sira-nia valor sira neebe fahe ba dame no progresu.
(eme)
