DILI, STLTIMORLESTE.com – Prezidente Republika (PR), José Ramos Horta hatoo sentidu kondolensia ba eis Prezidente Vietnam, Tran Duc Luong nia falesimentu.
Iha loron Sesta (23/05/2026) Prezidente Republika Jose Ramos Horta hatoo sentidu kondolensia profunda ba Republika Sosialista Vietnam nian hafoin falesimentu husi eis Prezidente Trần Đức Lương, neebe hakotu iis iha loron 20 Maiu 2025, iha Hanoi.
Iha karta kondolensia formal ida neebe diriji ba Prezidente Vietnam nian, Lương Cường, iha loron 21 Maiu 2025, Prezidente Ramos Horta rekonhese kontribuisaun signifikativu husi matebian Prezidente Trần Đức Lương ba dezenvolvimentu Vietnam nian no hametin relasaun bilateral sira entre Timor Leste no Vietnam.
Eis Prezidente Trần Đức Lương nuudar Xefe Estadu Vietnam nian husi tinan 1997 too 2006, períodu ida neebe marka ho estabilidade no dezenvolvimentu nasional neebe signifikativu. Durante nia mandatu, nia dedika nia moris hodi servi nasaun Vietnam no Partidu Komunista Vietnam nian, asumi kargu aas ho integridade no sabedoria.
Saudozu Prezidente dezempenha papel importante hodi haburas lasu istoriku amizade no solidariedade entre Timor Leste no Vietnam, hodi kontribui ba hametin relasaun bilateral entre nasaun rua nee.
“Prezidente Trần Đức Lương dedika nia moris ba servisu nasaun nian no Partidu Komunista Vietnam nian, asumi kargu aas ho integridade no matenek. Ninia legadu nuudar Xefe Estadu reflete períodu estabilidade no dezenvolvimentu signifikativu ba Vietnam no rekordadu ho respeitu no admirasaun jhusi ema hotu neebe partila valor sira ba pas, soberania no progresu povu nian,” afirma Prezidente Ramos Horta iha ninia mensajen kondolensia.
PR Horta dehan, hodi povu Timor Leste nia naran, Prezidente Ramos Horta hatoo sentidu kondolensia ba família enlutada no ba povu maun-alin Vietnam durante períodu lutu nasional ida-nee, hodi espresa esperansa katak memoria servisu Prezidente Trần Đức Lương nian sei kontinua inspira jerasaun Vietnam sira iha futuru.
(eme)
