DILI, STLTIMORLESTE.com – Prezidente Republika (PR), José Ramos Horta hatoo sentidu kondolensia ba Australia hafoin inundasaun neebe grave.
Prezidente Republika Jose Ramos Horta espresa profunda pesar no solidariedade ho Australia hafoin inundasaun grave neebe afeta rejiaun sudeste, liu-liu Hunter Valley no Mid North Coast, neebe rezulta lakon vida no destruisaun jeneralizada.
Husi karta kondolensia ofisial neebe STL asesu Sabadu *24/05/2025) dirije ba Sam Mostyn AC, Governador Jeral Australia nian, iha loron 23 fulan Maiu tinan 2025, Prezidente Ramos Horta hatoo sentidu kondolensia ba família enlutada no espresa profunda solidariedade ho vítima hotu no komunidade sira neebe afetadu husi dezastre natural ida nee.
“Iha tempu susar sira nee, ami nia hanoin no orasaun hamutuk ho sira hotu neebe enfrenta deslokasaun, lakon no sofrimentu, ami rekonhese no louva koraje estraordinariu no dedikasaun husi pesoal servisu emerjensia no autoridade lokál sira neebe maske kondisaun difísil no perigozu, servisu ho la hatene kolen hodi proteje vida no apoia membru sira neebe vulneravel liu iha komunidade afetadu sira.” katak PR Horta.
Prezidente sublina, Timor Leste nia apoiu neebe metin ba nia parseiru rejional, Timor Leste hamriik ho solidariedade metin ho Australia. “Imi nia belun longa data no aliadu neebe ami fiar. Ami reafirma ami nia prontidaun atu fornese asistensia no koopera iha esforsu rekuperasaun ruma neebe bele ajuda mitiga impaktu husi kalamidade devastadora ida nee no apoia rekonstrusaun komunidade sira neebe afetadu.” katak Horta.
Nia hatete, Australia nuudar parseiru rejionál ida neebe signifikante liu iha Timor Leste dezde independensia, ho nasaun rua nee mantein kooperasaun diplomatiku, ekonomiku no seguransa neebe metin iha setor oin-oin.
Prezidente Ramos Horta konklui ho reafirma Timor Leste nia kompromisu duradouro ba solidariedade no amizade maun alin ho Australia, hodi espresa sentimentu sira nee ho konsiderasaun no respeitu aas liu.
(eme)
