DILI, STLTIMORLESTE.com – Prezidente Republika (PR), Jose Ramos Horta hatoo kondolensia ba falesimentu husi eis Prezidente Uruguai Jose Mujica.
Prezidente no Lauriadu Premiu Nobel ba Pas, Jose Ramos horta hatoo ninia sentidu kondolensia profunda ba Governu no povu Uruguai ba falesimentu eis Prezidente Republika Oriental Uruguai nian. Jose Alberto “Pepe” Mujica, figura ikoniku iha istória polítika Amerika Latina no mundial neebe ninia moris no legadu kontinua fo inspirasaun ba ema rihun ba rihun.
Iha karta formal kondolensia nian neebe diriji ba Sua Exelénsia Sr. Yamandú Orsi, Prezidente Republika Oriental Uruguai nian, iha loron 14 fulan Maiu tinan 2025, Prezidente Ramos Horta hatoo nia sentidu kondolensia no solidariedade ba Povu Uruguai no Prezidente Mujica nia família enlutada iha momentu triste no lutu nasional ida-nee.
Prezidente Ramos Horta fo onra ba legadu notavel Prezidente Mujica nian, hodi dehan katak nia mak mane ida-neebe iha konviksaun metin no líder ho korajen admiravel.
“José Mujica nia viajen istoria nuudar símbolu rezistensia, simplisidade, no umanizmu nian. Ninia dalan husi luta revolusionariu no prizaun brutál too kargu aas liu Estadu nian reflete moris ida-neebe dedika ba justisa sosial, demokrasia no dignidade umana. Ninia rejeisaun ba luxu no ostentasaun, ninia moris simples iha area rural, no ninia kompromisu ba ema vulneravel sira halo nia sai hanesan ema Republikanu neebe loos, ezemplu raru ba koerensia entre liafuan no hahalok,” Katak PR Horta husi komunikadu neebe STL asesu, Kinta (15/05/2025).
Prezidente Ramos Horta nota katak iha lideransa Mujica nian, Uruguai asume papel pioneru ida iha promosaun direitu sivíl, liberdade individual, no polítika publika progresiva, hodi hetan respeitu no admirasaun iha mundu tomak.
Nia enfatiza katak Mujica nia lian kalma maibe metin sei kontinua moris hanesan sinal klaridade, umildade, no esperansa ba jerasaun futuru.
remata nia karta, Prezidente Ramos-Horta espresa nia esperansa katak memoria husi Prezidente Mujica sei kontinua orienta Uruguai no America Latina tomak iha sira nia dalan ba sosiedade neebe justu, kompaixaun, no livre liu.
(eme)
