DILI, STLTIMORLESTE.com – Prezidente Republika (PR), Jose Ramos Horta hatoo palestra kona-ba dezafiu pas iha mundu kontemporaneu.
Iha vizita estadu ba Bangladesh, Prezidente Jose Ramos Horta hatoo palestra ida ho titulu “Dame Iha Mundu Kontemporaneu Iha Institutu Internasional no Estratejiku Estudu Bangladexe Nian (BIISS) iha Dhaka”.
Liu husi komunikadu neebe STL asesu husi media PR Kuarta nee (18/12/2024) hatete, iha nia diskursu Prezidente Ramos Horta koalia kona-ba konflitu global oin-oin, inklui funu Ukrania-Rusia, krize sira iha Síria no Israel-Palestina, no situasaun iha Mianmar.
Nia sublina, papel Konselhu Seguransa Nasoins Unidas nian no kritika líder mundial sira, tanba sira nia falta sira iha prevensaun konflitu.
Prezidente destaka mos signifikadu husi kooperasaun rejional, hodi espresa optimizmu kona-ba adezaun antesipadu Timor Leste nian ba iha Asosiasaun Nasaun Sudeste Aziatiku nian (ASEAN) iha tinan oin.
Xefe Estadu mos aborda krize Rohingya nian, nia sublina nesesidade mos atu rezolve kestaun ida nee hodi garante estabilidade rejional.
Prezidente Ramos Horta elojia mos Xefe Konselheiru Governu Bangladeze nian (PM Interinu) Profesor Muhammad Yunus ba ninia esforsu global hodi hamenus kiak liu husi inisiativa mikrokreditu. Xefe Estadu lembra wanhira nia konvida Profesor Yunus mai Timor Leste iha 2004 hodi introdus mikrokreditu no marka inísiu ba programa sira iha TL.
PR Reflete kona-ba TL nia progresu dezde hahu independensia iha 2002, Prezidente Horta mos nota ho Timor Leste nia avansu signifikativu sira, inklui habelar kobertura eletrisidade besik 97% husi total populasaun Timor nian no hasae esperansa moris husi idade 60 mai kraik ba too idade 70 liu.
Durante nia vizita, iha ajenda lokraik nian Prezidente Ramos Horta mos halo audensia seminar ho estudante sira no lider juventude sira hodi sublina importansia lideransa nian entre juventude sira hodi hasoru dezafiu domestiku no internasional atual sira.
Programa nee hahu, loke ho Kantiku Timor nian Oh Timor neebe hananu husi Ego Lemos nuudar Enviadu Espesial no Embaixador Boa Vontade ba Meiu Ambiente no Rekursu Bee.
Hafoin nee Prezidente Horta halo mos audensia ho estudante Timoroan sira hamutuk nain 10, neebe dadaun nee halao estudu universitariu iha Bangladesh. Estudante sira kontente bele hasoru malu direta ho Prezidente Republika hanesan mos Líder Mundial, hodi fahe sira nia esperiensia no prekupasaun.
Xefe vizita ba Bangladexe subliña kompromisiu atu hametin relasaun bilateral sira no esforsu kolaborativu hodi rezolve dezafiu global sira.
(eme)
