DILI, STLTIMORLESTE.com – Prezidente Republika (PR) José Ramos Horta hatoo parabens ba feto no labarik feto iha Timor Leste no mundu tomak.
Prezidente Republika hatoo kongratulasaun nee liu husi mensajen ba loron feto no labarik feto iha Palasiu Prezidensial Nicolau Lobato, Bairo Pite, Sesta (07/03/2025).
“Doben sidadaun Timor Leste no belun sira iha mundu tomak, iha Loron Internasionál Feto, hau hatoo hau nia parabens ba feto no labarik feto hotu iha Timor Leste no iha mundu tomak, bainhira ita hamutuk ho tema Internasional Ba Feto no Labarik-Feto hotu direitu sira, igualdade, empoderamentu no ita nia tema nasional “Feto Bele Lidera Iha Area Hotu”. katak PR Horta.
PR Horta dehan, istoria Timor Leste nian la bele haketak husi forsa no rezistensia husi Timor Leste ba feto sira.
“Husi ita nia luta ba independensia too ita nia viajen kontinua ba harii nasaun, feto Timor Leste hatudu ona lideransa esepsional, korajen no determinasaun. Sira sai ona funu na’in, ema neebe halo dame, emprezariu, edukador, fornesedor kuidadu saude, no guarda ba ita nia patrimoniu kultural,” katak PR, Horta.
Prezidente Republika hatutan, ho tema loron feto, Ita nia tema nasional tinan ida nee “Bele Lidera iha Area Hotu”.
“Ita nia tema nasional tinan ida nee “Feto Bele Lidera Iha Area Hotu” laos deit aspirasaun, maibe apelu ba asaun. Ida nee dezafia ita atu rekonhese no apoia feto sira nia potensial lideransa iha area hotu, husi governu no negosiu too agrikultura no akademia. Ida nee fo hanoin mai ita katak bainhira feto lidera ita nia nasaun tomak hetan benefísiu husi sira nia perspetiva uniku, ideia inovativu no abordajen kolaborativu sira,” katak PR Horta.
Xefe Estadu hatutan, dalan ba igualdade lo-loos presiza envolvimentu husi sosiedade tomak. “Hau husu ba mane no labarik mane sira atu sai aliadu ativu iha jornada ida nee, dezafia estereotipu sira neebe prejudika no apoia feto sira nia lideransa iha iha sira nia família, servisu fatin no komunidade. Lideransa la hatene jeneru, no progresu presiza partisipasaun tomak husi ita nia ema hotu. Bainhira ita empodera feto sira atu lidera, ita eleva ita nia nasaun tomak,” kata nia.
Nia hatutan, iha Loron Internasional Feto, mai renova kompromisu atu harii futuru ida hamutuk no kria nasaun ida neebe justu, pasífiku no prosperu liu ba ema hotu. Maromak haraik bensaun ba Feto Timor Leste no ba nasaun doben. Viva Feto Timor Leste.
(eme)
